اسلام آباد۔ 15دسمبر (اے پی پی) صدر مملکت ممنون حسین پارینے کہ قائد اعظم نا پنت و شون نا رداٹ قوم انا غٹ تپہ غاک کانود و ’’رولز آف دی گیم‘‘ نا شرف ءِ کیر و غٹ ویل و اختلاف حب الوطنی و خیر خواہی نا جوزہ و نیک نیتی و سیوت اتون ایسر کیر۔ اوداہیت ءِ بابائے قوم قائد اعظم محمد علی جناح نا سال دے انا بابت جمعہ نا دے ایوان صدر اٹی اڈ ہلوک آ اسہ خصوصی ءُ دود اسے آن تران کرسا پارے۔ داوخت آ چیئرمین ہائر ایجوکیشن کمیشن ڈاکٹر مختار احمد، ممتاز ترک سکالر و یونس ایمرے انسٹی ٹیوٹ ترکی نا ڈائریکٹر پروفیسر ڈاکٹر خلیل طوقار و ممتاز ادیب و دانشور پروفیسر ڈاکٹر طاہر مسعود ئسک ہم تران کریر۔ صدر مملکت پارے کہ دابھاز بھلو ڈکھ انا ہیت اسے کہ سیوت نا ہرا سبخ ءِ ننا بزرگ آک قیام پاکستان آن ہم مست ننے ہیل تسوسر ، آجوئی آن پد اودے است آن دننگا ہراٹی قیام پاکستان نا چنکو وخت اسے آن پد ہی وطن عزیز اٹی سیاسی بے اصولی و کانود شکنی نا مظاہر لس مس ولے مستین خڑک و خاص وڑاٹ ساڑی آ دور اٹی تو حالیت بھاز بگڑینگانے، اینو سیاسی ، معاشی ، راجی ، مذہبی ، انتظامی داخس کہ دژمن تون مون تننگ کون آ اہم انگا معاملہ غاتے ٹی ہم ہرامشکل آتا ننے مون تروکی ءِ اونا ماسک کانود نا شرف کپننگ و رولز آف دی گیم انا خلاف ورزی ٹی مضمر ءُ۔
