مظفر آباد۔ 15دسمبر (اے پی پی) وزیراعظم شاہد خاقان عباسی پارینے کہ پاکستان مسلم لیگ (ن) نا حکومت تینا وخت ءِ پورو کیک و کارکڑد نا بنداو آ السی تائید اٹ 2018ء نا لس گچین کاری تیٹی اسہ وار ولدا حکومت جوڑ کیک، اسہ سازش اسے آن ہم خوفزدہ اف، الس نا واک اٹ اقتدار اٹی بسنے و 2018ء ٹی السی مخ تفی و تائید اٹ انشاء اللہ دُوارہ حکومت جوڑ کیک، پاکستان مسلم لیگ (ن) نا حکومت نا گام گیج آتا سوب الحمد اللہ پاکستان بجلی ٹی خودکفیل مسنے، داوخت ننا بجلی نا لائخی طلب آن زیات ءِ، چندی ڈٹ و زیر تکمیل ڈٹ آتا پوروی آن پد پاکستان 2030 ء اسکان بجلی نا پیداوار اٹی خودکفیل مریک۔ مسلم لیگ (ن) نا چار ءُ نیم سال انا موازنہ 2002ء آن ہلیس 2013ء اسکان جوڑ مروک آ حکومت آتا کاریم اٹ کننگے۔ او جمعہ نا دے داڑے 147 میگاواٹ پترنڈ ہائیڈرو پاور پروجیکٹ نا بنائی دود آن تران کریکہ۔ داوخت آ آزاد کشمیر نا صدر سردار مسعود خان ، وزیراعظم راجہ فاروق حیدر، بنجائی وزیر امور کشمیر و گلگت بلتستان برجیس طاہر ، چیف سیکرٹری آزاد کشمیر ، آزاد کشمیر کانود ساز اسمبلی وزیر آتون اوار پترنڈ ہائیڈرو پاور پروجیکٹ نا بڑزکو کمامدارآک ہم ساڑی ئسر۔ وزیراعظم شاہد خاقان عباسی ڈٹ انا پوروی آ خوشی نا درشانی ءِ کرسا پارے کہ دا پاکستان و کوریا نا سنگتی نا اسہ اہم ءُ ڈٹ اسے ہراڑآن آزاد کشمیر اٹی بجلی نا گرج آک پورو مریرہ۔ ڈٹ ءِ تخوک آ وخت اٹ پورو کننگ ننکن خوشی نا سوب ءِ۔
