اسلام آباد۔ 15 دسمبر (اے پی پی) وزیراعظم شاہد خاقان عباسی پارینے کہ حکومت کاروبار سنگت چاگڑد نا مون آ دننگ و سوگوی کن کاروباری برادری ءِ ہر وڑنا کمک فراوان کرسا کیک۔ غٹ چیمبرز آف کامرس برآمد آتیٹی ودکی نا بابت حکومت ءِ جامع ڈٹ پیش کیر۔ اوداہیت ءِ بنجاء ایوان ہائے صنعت و واپار (ایف پی سی سی آئی ) نا ڈل اتون ہیت وگپ کرسا پارے ہرا جمعہ نا دے پارلیمنٹ ہاؤس اٹی وزیراعظم نا چیمبر اٹی اوڑتون اوڑدہی کریر۔ وزیراعظم نا خصوصی کمکار ہارون اختر ہم داوخت آ ساڑی ئس۔ اوڑدہی ٹی برآمد آتیٹی ودکی نا بابت معاملہ غاتیا ہیت وگپ مس۔ وزیراعظم پارے کہ غٹ چیمبرز آف کامرس دابارواٹی اسہ جامع ڈٹ آ پیش کیر کہ ہراوڑحکومت اونا پین کمک ءِ کننگ کیک و معقول نظام الاوقات نا تہٹی برآمد آتیٹی ودکی نا بابت ہم سلاہ پیش کننگے۔ ڈل کرنسی نا ایڈجسٹمنٹ کن حکومتی فیصلہ نا ستاءِ کرسا پارے کہ داڑآن برآمد کروک آتے بھاز کمک رسینگک۔ ڈل معیشت اٹی جم اٹنگا گمانی نمو و برآمد آتا بحالی نا بابت اومیت نا درشانی ءِ کرے ہرافتیان 10 درسد آن زیات سوگو نمو ظاہر مننگ ءِ و درملکی کرنسی تامقابلہ ٹی روپئی نا ایڈجسٹمنٹ نا بناء غا پین نمو گمانی ءِ۔ ایف بی آر نا کنڈآن کٹیا غاتا وصولی ٹی ہم 22درسد آن زیات نا ودکی مسنے و گمان کننگک کہ ایف بی آر تینا کٹیا تی ہدف آتے دوئی کیک۔
