گچین کاری نظام ءَ را جوان ، گشاد ءُ ساپءُ صلہ کنگءَ ابید چکانی ھیال ءِ تہا بنداتی اُمبرءَ چہ ووٹ ءِ شرپ ایر کنگ بہ بیت،
اسلام آباد۔07دسمبر(اے پی پی) ملک ءِ صدر ممنون حسین ءَ گشتگ کہ چاگردءِ تہاھمک مردم دلءُ جانءِ گوما اے بہ من ایت کہ آئیءِ بھتءِ پیسلہ تنا ءُ تنا ووٹءِ وسیلگءَ بوت کنت، گچین کاری نظام ءَ را جوان ، گشاد ءُ ساپءُ صلہ کنگءَ ابید چکانی ھیال ءِ تہا بنداتی اُمبرءَ چہ ووٹ ءِ شرپ ایر کنگ بہ بیت۔ آئیءَ ا ے گپ پنچ شمبے ءِ روچءَ ووٹر آنی راجی روچءِ ھوالگءَ ایوان صدرءَ بوتگیں مراگشءَ گوں تران کنانءَ کتگ۔ مراگش ءِ تہا تہی کارانی بنجاھی وزیر ءُ چیف الیکشن کمشنر ءَ ھوار بوتگ اَنت۔ صدر ممنون حسین ءَ گشتگ کہ مرچی مہ ووٹر آنی اے روچءَ را وش ھالی ءِ گوما گوازینگءَ اَنت کہ مئے گچین کاری نظام جدید زمانگ ءِ تہا پُترتگ۔ صدر ممنون ءَ گشتگ کہ الیکشن کمیشن ءِ گامگیجاں چہ اے سرپدی رسیت کہ آ گچین کاری عمل ءَ را گیش گہتر جوڈ کنگءِ ھاترءَ سول سوسائٹی ءَ ھوار ریاست ءِ دگہ ادارگ آنی کمک ءَ زورگءَ اِنت۔ اے مز نیں مول ءُ مراد ءِ ھاترءَ ھمگرنچیں ادارگءُ چاگردءِ دگہ تبکاں مزنیں جہدے کتگ۔ راج اُمیت کنت کہ آیوکیں لس گچین کاریءِ کشک ءَ استیں دگہ تکنیکی جیڑھءُ جنجال ھم اے ارزانی ءِ گوما ھلاس بنت۔ مراگشءَ چہ چیف الیکشن کمشنر ءُ سیکرٹری الیکشن کمیشن ءَ ھم تران کتگ۔
