اسلام آباد۔ 4 دسمبر (اے پی پی) مزن وزیر شاہد خاقان عباسی ئَ دو شمبے ئَ بُنجاھی دارالحکومت ئَ نوکیں اسلام آباد انٹرنیشنل ائیر پورٹ ئَ گوں ملارینگ ئِ واستہ میٹرو بس سروس ئِ روڈ انفراسٹرکچر ئُُ سیادی داروکیں کار آنی بابت ئَ چار ئُُ تپاسی ئِ واستہ برجم داشتگیں دیوان ئِ سروکی کت۔ نیشنل ہائی وے اتھارٹی ئِ چیئرمین شاہد اشرف تارڑ ئَ مزن وزیر ئِ 25.6کلومیٹر دراج بُریں سڑک ئِ جوڑیشت ئِ بابت ئَ بریفنگ دات۔ آئیئَ گوشت کہ اے منصوبگ 12کلدار ئِ ھرچ ئُُ درچ ئَ سرجم کنگ بوھگ ئَ اِنت۔ دیوان ئَ گوشگ بوت کہ ٹھلیاں موٹروے ئَ تاں کار گولنگ پیسر ئَ چہ سرجم کنگ بوتگ۔ دیوان ئِ تہئَ گوشگ بوت کہ ائیر پورٹ لنک روڈ ئُُ میٹروبس سروس منصوبگ ئِ جوڑیشت ئَ چہ نا ایوک ئَ دوئیں جاڑیں شہر آنی نندوکیں مردم آناں آسراتی رسیت ئُُ ایشاناں نوکیں ائیر پورٹ ئَ تاں آسانی ئَ رسد رسیت بلکینگ ئَ بنجاھی دارالحکومت ئِ نوکیں سیکٹر ئُُ راولپنڈی شہر ئِ نزیکیں دمگ آں ھوار کش ئُُ کرّّ ئِ دمگ آنی اُلس ئِ ٹرانسپورٹ ئِ ھوالگ ئَ جیڈھ آنی گیواری ھم بیت۔ مزن وزیر ئَ منصوبگ ئِ سرئَ کار ئِ گام آنی ترند کنگ ئُُ میٹروبس سروس منصوبگ ئَ را زوت سرجم کنگ ئِ واستہ پنجاپ ماس ٹرانزٹ ئَ ھوار دُرستیں پریکیں آنی گوما المی ایں کورآرڈینیشن ئَ دل یکیمی دیگ ئِ پنت ئُُ شون کت۔ این ایچ اے ئِ چیئرمین ئَ مزن وزیر ئَ 33کلومیٹر راولپنڈی کہوٹہ روڈ ئَ را دو کشک جوڑ کنگ ئِ بابت ئَ بریفنگ دات۔ آئی ئَ گوشت کہ اے منصوبگ ئِ پی سی سن پیسر ئَ چہ تیار کنگ بوتگ ئُُ منظوری ئِ پند آن اِنت ئُُ اے منصوبگ ئَ را زوت بنگیج کنگ ئِ ھاترا گامگیج کنگ بوھگ ئَ اِنت۔ چیئرمین این ایج اے ئَ مزن وزیر ئَ را این ایچ اے ئِ دومی منصوبگ آنی بابت ئَ سرپد کت ئُُ گوشت کہ این اےچ اے ئِ منصوبگ گیشینتگیں وھد ئُُ پاس آنی تہئَ سرجم کنگ بنت۔
