سوچی ۔ یکم دسمبر (اے پی پی) مزن وزیرشاہد خاقان عباسی ئَ آدینگ ئِ روچ ئَ نیامی ایشیائی ریاست کرغزستان ئِ مزن وزیر سفرایزاکوف ئَ گوں دو نیمگی گند ئُُ نند کت۔ مزن وزیر ئَ کرغزستان ئِ وتی ھمکار ئَ را اے سیٹ ئِ سر نندگ ئِ مبارکی دات ئُُ شنگھائی کمکی گل ئِ باسکی ئَ پاکستان ئِ گوما کمک کنگ ئِ پد ئَ کرغزستان ئِ شگر گپت۔ گرغزستان ئَ مزن وزیر ئَ شنگھائی کمک گل ئَ پاکستن ئِ بھر زوری ئَ را وش اتک کت ئُُ ایشرا گل ئِ یک لائک ستائیں مڈی ئِ نامینت۔ دوئیں مزن وزیر ئَ شنگھائی کمکی گل ئِ فریم ورک ئُُ دو نیمگی بنیاتی کمک ئِ دیمروئی ئِ رپک آنی سرئَ گپ ئُُ تران کت۔ دوئیں سروک آں کاسا 1000پراجیکٹ ئِ رد ئَ توامیں منوگری ئِ سر ئَ دل یکیمی ئِ درشان کت ایشیئَ چہ پد اے منصوبگ ئِ سر ئَ کار بندات بوھگی اِنت۔ شریک آں تجارت ئُُ دیمپانی ئَ ھوار وت مہ وتی یکوئی ئِ توامیں شوبگ آنی دیمروئی دیگ ئِ سرئَ تپاک کت۔ آواں دوئیں ملک آنی صنعت ئُُ تجارت ئِ ایوان ئِ نیام ئَ گیشاں گیش کمک کنگ ئِ سر ئَ تپاک کت۔ مزن وزیر ئَ گوشت کہ پاکستان ئَ ہائی ویز ئُُ موٹرویز ئِ دیمروئی ئَ چہ کرغزستان ئُُ پڑ ئِ ایندگر ملک آناں ھم نپ رسیت ایشی ئِ نتیجگ ئَ گوادر ئُُ پاکستان ئِ ایندگر دکہ آں گوں روگ ئُُ آیگ بیت۔ اے رد ئَ آئی ئَ پاکستان، چین کرغزستان ئُُ قزاخستان ئِ نیام ئَ ٹرانزٹ ئِ منوگری ئَ 4باسکی ٹریفک ئِ ارزشت ئِ سرئَ چمشانک ھم دات۔ مزن وزیر ئَ اقتصادی کمک ئِ گل ئِ پڑ ئَ روگ ئُُ آیگ ئِ تہئَ گیشی ئِ سر ئَ زور پر دات ایشی ئِ دوئیں ملک باسک اَنت، پاکستان اے وھد ئَ اے گل ئِ سروکی ئَ کنگ ئَ اِنت، شریک آں پاکستان ئُ کرغستان ئِ نیمائَ مھکمیں شریکی ئِ برجائی ئِ سرئَ تپاک کت۔ آئی ئَ کرغزستان ئِ مزن وزیر ئَ را پاکستان ئِ تر ئُُ تاب ئِ دعوت دات ایش آئیئَ قبول کت۔
