اسلام آباد۔ 13نومبر (اے پی پی) صدر مملکت ممنون حسین بنجائی حکومت نا آرٹسٹس ویلفیئر فنڈ آن ملک انا چندی بشخ آتیان تعلق تخوک آ فنکار آتے کن مالی امداد نا منظوری ءِ تسنے۔ دوشنبے نادے بنجائی حکومت نا آرٹسٹس ویلفیئرفنڈ انا دیوان اس صدر مملکت نا کماشی ٹی ایوان صدر اٹی مس ہراٹی وزارت خزانہ ، کابینہ ڈویژن ، سیکرٹری اطلاعات ، سیکرٹری وزارت جان جوڑی و کمیٹی نا ایلو باسک آک ساڑی ئسر۔ دیوان اٹی کمک کن بروک آ درخواست آتا جاچ ءِ ہلسا ضرورت مند فنکار آتا مالی امداد نا منظوری ءِ تننگا۔ داوخت آ صدر مملکت پارت کرے کہ وزیراعظم نا قومی جان جوڑی پروگرام نا رداٹ ناجوڑ فنکار آتا درمان نا خصوصی بست و بند ءِ کننگے۔ داچرجوئی ٹی او وزارت جان جوڑی ءِ پارت کرے کہ او حالیت نا جاچ ءِ ہلسا دمدستی وڑاٹ گام گیج کے۔ صدر مملکت سنسر کمیٹی ءِ پارت کرے کہ ملک اٹی دُن ءُ ہچ ءُ درملکی فلم اسے نا موکل تننگپ ہراڑآن پاکستان نا برخلاف پروپیگنڈہ کننگوئے۔ داوخت آ آرٹسٹ ویلفیئر فنڈ سٹیئرنگ کمیٹی نا باسک آک عطاء الحق قاسمی، اصغر ندیم سید، عارف حبیب، مصطفی قریشی، نجیب اللہ انجم، شاہد شفیق، قوی خان، سلمان علوی، زیبا محمد علی و بڑزکو کمامدارآک ہم ساڑی ئسر۔
