بلوچستان اٹی خاص وڑاٹ مر مر انگا علاقہ غاتیٹی شونداری کاریم تا پبی کوریج و اے پی پی کوئٹہ بیورو نا جوانی کن کاریم کننگک
عملہ صوبہ نا حقی ڈیک ءِ تالان کننگ کن بروخت و درست خبر آتا دمدستی فراوانی ءِ المی جوڑ کے
کوئٹہ۔ 12نومبر (اے پی پی) ایسوسی ایٹڈ پریس آف پاکستان (اے پی پی) نا منیجنگ ڈائریکٹر مسعود ملک پارینے کہ بلوچستان اٹی خاص وڑاٹ مرمر انگا علاقہ غاتا شونداری کاریم تا پبی کوریج و کوئٹہ بیورو نا جوانی کن کاریم کننگک ۔ یک شنبے نادے کوئٹہ بیورو آفس نا عملہ آن تران کرسا اوصوبہ نا حقی ڈیک ءِ تالان کننگ کن اے پی پی نا سبسکرائبرآتے بروخت و درست خبر آتا فراوانی آ زورشاغا۔ اوعملہ غا زور شاغا کہ صوبہ بلوچستان اٹی دہشت گردی نا لعنت نا چٹفنگ کن سخت کوشست آتے ہم تالان کننگے۔ او ڈی آئی جی حامدشکیل نا خاہوت تون دلی ہڑزخواہی نا درشانی ءِ کرے ہرا پنچ شنبے نادے مروک آ خودکش جلہو اٹی شہید مسوسس۔ مسعود ملک اے پی پی کوئٹہ بیورو نا چندی سیکشن آتا دورہ ءِ ہم کرے ہراٹی اودے بیورو نا مون تروک ویل آتا بارواٹ بریف کننگا۔ او عملہ نا انفرادی ویل آتے خف تورے و باوری ترفے کہ ملازم آتا روا ویل آتے زوت ایسر کننگک۔ او کوئٹہ اے پی پی بیورو نا کاریم اٹ پین گچینی و اودے پین جدی و جوانی اٹ کاریم کننگ نا گام گیج چست کننگ نا چرجوئی ٹی ہمووخت آ پرمان تس کہ ہرا پاک چین اقتصادی راہداری (سی پیک ) آن تعلقدار شونداری کاریم تے تالان کننگ اٹ اہم کڑد ادا کننگ ءِ وخت اس کہ داسی پیک ڈٹ آن صوبہ نا قسمت ہی بدلینگک انتئے کہ ارب آ روپئی نا سی پیک شونداری ڈٹ آن ہندی خلقت کن روزگار نا وارخواہی ہم ودی مریک۔ اے پی پی نا منیجنگ ڈائریکٹر مسعود ملک ڈائریکٹر کوآرڈینیشن اکرم ملک تون ادارہ نا صوبائی ہیڈ کوارٹر نا گونڈءُ دورہ سے ٹی کوئٹہ پریس کلب نا ڈل اتون ہم غیر رسمی اوڑدہی کرے و ڈل انا باسک آتون میڈیا ءِ مون تروک چیلنج آتا بارواٹی خیال آتا درشانی ءِ کرے ۔ اواوفتے باوری ترفے کہ اے پی پی صوبہ ٹی تینا قابل قدر سبسکرائبرز آتے مستعدی اٹ نیوز سروس نا فراوانی نا چرجوئی ءِ برجاتخک۔
