اسلام آباد۔ 12نومبر (اے پی پی) بنجائی وزیر موسمیاتی بدلی سینیٹر مشاہد اللہ خان پارٹیز 23کانفرنس اٹی بشخ ہلوک آ پاکستانی ڈل انا سرکڑدہ ہی ءِ کرسا (اینو) جرمنی نا شار بون آ سرمریک۔ بنجائی وزیر سینیٹر مشاہد اللہ خان پارٹیز اتون مروک آ معاہدہ نا رداٹ پاکستان نا چندی سرسہبی و پورو کروک آ وعدہ غاتا بارواٹ پاہک۔ داکانفرنس 6نومبر آن بناء کریسس و 17 نومبر 2017ء اسکان برجاسلک۔ باسک ملک آک بطور پارٹیز معاہدہ و خاص کر پیرس معاہدہ غاتیا ترندی اٹ عملدرآمد نا حکمت عملی تا بارواٹ خیال آتا درشانی ءِ کننگ ءُ وخت اس کہ پیرس معاہدہ غان امریکہ نا پیش تمنگ آن دامعاہدہ غا عملدرآمد آ تموک آ زہم آتا جاچ ءِ ہلنگ ہم کانفرنس نا ایجنڈاٹی اوار ءِ۔ کانفرنس نا بڑزکو کہولی دیوان داسہ 13نومبر آن مننگ ءِ ہراٹی چندی ڈل آتا سروک آک اہم انگا دود آتیٹی بشخ الیرہ۔ جرمنی نا چاگڑدی چاروکی نا ادارہ پاکستان ءِ موسمیاتی بدلی تیان غٹ آن زیات زہمی 7ملک آتیٹی اوار کرینے۔ مچ آ دنیا ٹی داوخت آ خارج مروک آ کاربن اٹی پاکستان نا بشخ بیرہ 0.08 درسد ءِ۔
