اسلام آباد۔10نومبر(اے پی پی) مزن وزیر شاہدخاقان عباسی ئَ گشتگ کہ پاکستان ئِ گورئَ سائنس ءُ ٹیکنالوجی ئِ پڑئَ دنیاءرا پیش کنگئِ ھاترئَ باز چیر اَست۔ سائنس اقتصادی ، سیاسی ءُ سماجی پراھءُ شاھگانی ئِ ھاترئَ بنکی ارزشت داریت ، راجی دیمروئی ئِ ھاترئَ حکومت ، نجی پڑ، اکیڈمیہ ءُ کواس یک جاھ کار بہ کن اَنت، وانگءُ سائنسئِ پڑئَ دلگوشی دیئگئَ پاکستان زوت دنیائِ دیمروئی کتگیں راجانی تہا وتی جائن جاھئَ ھاصل کُت کنت۔ مز ن وزیر ئَ سائنسءُ امنءُ ایمنی ءُ دیمروئی 2017ئِ میاں اوستمانی روچئِ درگت ئَ وتی کلوھئِ تہا گشتگ کہ سائنسی پٹءُ پول انسانی دیمروئی وشھالی ئِ یک بنکی محرک بوت ءُ مارا اے گپءِ سرئَ پھر اِنت کہ سائنسی پٹءُ پول دوستی اسلامی دنیائِ میراث بوتگ، مسلمان زانتکاراں یورپ ئِ راج دپتری زمانگاں ھم سائنسی علمءُ پٹءُ پولئِ جزبگئَ را زندگ داشتگ بوتگ۔ مزن وزیرئَ گشتگ کہ لاہورئِ یک ورناھے محمد شہیر نیازی ئِ انوگیں جوانیں سوبمندی کہ 17سالئِ اُمبر ئَ آئیئِ رائل سوسائٹی اوپن سائنس جرنل ئَ مقالہ ئِ شنگ بوھگئَ مئے مردمانی بازی ئَ بلدی ئِ یات گیتکگ۔ آئی ئَ گشتگ کہ اے سال ئَ سائنسئِ میاں اوستمانی روچئِ سرھال ”سائنس فارگلوبل انڈرسٹینڈنگ“ باز جوان اِنت۔ مزن وزیر شاہد خاقان عباسی ئَ گشتگ کہ جان ءُ سلامتی ، انجینئرنگ ءُ کمپیوٹر سافٹ ویئر وڈیں پڑآں پاکستان ئِ کارئِ وڈ ءُ پیم میاں اوستمانی تک ئَ منگ بنت۔ آئی ئَ گشتگ کہ سائنس اقتصادی، سیاسی ءُ سماجی پراھءُ شاھگانی ئِ ھاترئَ پیسرئَ چہ ھم گیش بنکی ارزشت داریت ، اے ھوالگئَ حکومت پاکستان مئے چاگرد ءُ معیشت ءُ وانگ ءُ ھاس سائنسز ئِ پڑئَ گیشی ئَ را باندات ئَ گیش کنگئِ جزم ئِ درشانی کتگ۔ مزن وزیر ئَ گشتگ کہ منی وتی اُلسئِ سرئَ اوست اِنت، وتی چک ءُ ورناھ آنی وانگءُ زانگءُ سائنسئِ پڑئَ پٹءُ پولءُ سکالرشپ ئِ رواج ئَ را گیش مھکم جوڈ کنگئَ پاکستان باز زوت دنیا ئِ دیمروئی کتگیں راجانی تہا وتی جاھئَ جوڈ کنت۔
