اسلا م آباد۔08نومبر(اے پی پی) ملک ئِ صدر ممنون حسین ئَ گشتگ کہ جلال آباد ئَ پاکستانی سفارتکارئِ بے رحمیں کوشئِ سرئَ اپسوز اِنت، اوگانستان ءَ را سفارتکارانی رکھینگءُ دمگی امنءُ ایمنی ءُ مھکمی ئِ ھاترئَ وتی زمہ واری سرجمی ئَ پیلو کنگ لوٹ اَنت، پاکستان اے ھوالگئَ وتی براتیں ملک ئِ گوما سرجمئَ کمک کنت۔ صدرئَ اے ایوان صدر ئَ 107می نیشنل مینجمنٹ کورسئِ تہا ھوار بوتگیں مردمانی گوما تران کنانئَ کتگ۔ اے موھئَ ریکٹر ، نیشنل آف پبلک پالیسی عظمت علی رانجھاءُ اسٹیبلشمنٹ سیکرٹری اسد حیاءالدین ئَ ابید دگہ مزنیں حکام ھم ساڑی بوتگ اَنت۔ صدر ئَ گشتگ کہ پاکستان اوگانستان ئِ تہا امنءُ ایمنی ءُ دیمروئی ئِ واھشت مند اِنت۔ اے ھوالگئَ اوگانستان ئَ را پاکستان ئِ سرئَ اوست کنگ لوٹ ایت، منئَ بھروسہ اِنت کہ اوگانستان بانداتئَ پاکستانئِ نزیک تریں دوست بیت۔ آئی ئَ گشتگ کہ سی پیک ئِ روٹئِ تہا ایچ وڈیں مٹءُ بدلی کنگ نہ بیت۔ اے منصوبہ ئَ چہ گیش پاھدگ بلوچستان ئَ بیت۔ انوں زوتاں نمل شاہ دربرجاھ ئَ وتی یک کیمپسے بلوچستانئَ جوڈ کتگ کہ تنکہ بلوچ ورناھ چینی زبان ئَ سرپد بہ بنت ءُ روزگارئِ موھاں چہ پاھدگ چست بہ کن اَنت۔اے موھئَ صدرئَ باسکانی جستانی پسوھم داتگ اَنت۔
