اسلام آباد۔ 07 نومبر (اے پی پی) وزیراعظم شاہد خاقان عباسی پاک۔ چین اقتصادی راہداری آن ودی مروک آ بے پناہ وارخواہی و پبی اقتصادی لائخی تے تالان کرسا پارینے کہ پاکستان نا حکومت ملک اٹی کٹیا کروک کاروباری ڈٹ آتا بناء کننگ کن درملکی زرکار و کاروباری برادری ءِ ہروڑنا آسراتی تننگ کن پرعزم ءِ۔ اوداہیت ءِ بینک آف چائنہ نا چیئرمین چن سائیچنگ تون ہیت وگپ کرسا پارے ہرا سے شنبے نا دے وزیراعظم آفس اٹی اوڑتون اوڑدہی کرے۔ وزیراعظم اودے پاکستان اٹی بینک آف چائنہ نا سرجزآتا بناء آ مبارکبادی ترسا پارے کہ داگام ہڑتوم آ ملک آتا نیام اٹ بینکاری رابطہ غاتے پین سوگوی تننگ و اقتصادی سرجزآتا مون آ دننگ اٹ اسہ اہم ءُ مزل اسے نا نشان جوڑ مریک۔ پاک۔ چین اقتصادی راہداری نا حوالہ ءِ ترسا وزیراعظم پارے کہ دا عظیم الشان ڈٹ نئے بیرہ ہڑتوم آ ملک آتا الس بلکن ڈیہہ و اوکان مون آ راجی و اقتصادی شونداری کن اواری اٹ کاریم کننگ کن ہڑتوم آ ملک آتا سرکڑدہ غاتا پکا عزم انا واضح عکاس ءِ۔ وزیراعظم بینک آف چائنہ ءِ ملک اٹی اونا سرجز آتا سرسہبی اٹ انجام تننگ نا بابت ہروڑنا کمک و مخ تفی نا باوری ترفے۔ چن سائیچنگ پاکستان اٹی بینک آف چائنہ نا سرجزآتا بناء کن کمک و کمکاری آ وزیراعظم نا منت واری ءِ ہرفے۔
