وزیراعظم شاہد خاقان عباسی تون متحدہ عرب امارات نا پوسکن آ سفیر حمد عبید ابراہیم سالم الزابی نا اوڑدہی

اسلام آباد۔ 07 نومبر (اے پی پی) وزیراعظم شاہد خاقان عباسی تون متحدہ عرب امارات نا پوسکن آ سفیر حمد عبید ابراہیم سالم الزابی سے شنبے نادے وزیراعظم آفس اٹی خیر سگالی اوڑدہی اس کرے۔ وزیراعظم سفیر ءِ بخیر اٹ پارسا داہیت آ زور شاغا کہ پاکستان و یواے ای نا نیام اٹ تاریخ ، گرم جوشی و ایلمی اتون عبارت خڑکی تعلقداریک ءُ ہرابایدے ہند ن سلر۔ یو اے ای نا سفیر جم و جوش اٹ بخیر کننگ آ وزیراعظم نا منت واری ءِ ہرفسا پارے کہ او ہڑتوم آ ملک آتا نیام اٹ تعلقداری تے پین سوگوی تننگ نا سوگو عزم اتون بسنے۔ اووزیر خارجہ خواجہ آصف نا ’’سربانی یاس فورم ‘‘ اٹی ساڑی آ شرکت وپاکستان و یو اے ای نا وزیر آتا نیام اٹ شاندار اوڑدہی نا ستاءِ کرے ۔ اوپارے کہ او ہڑتوم آ ملک آتا نیام اٹ سوگو اقتصادی تعلقداری تا سوگوی کن مریس وختی روڈ میپ نا خواہندار ءِ۔ وزیراعظم یو اے ای نا سفیر ءِ باوری ترفے کہ پاکستان یو اے ای ٹی ایکسپو 2020 ء ٹی نمان وڑاٹ شرکت کیک۔ وزیراعظم پارے کہ او پاکستان اٹی یو اے ای نا سرکڑدہ نا خیرمقدم ءِ کننگ آ خوشی محسوس کیک، داڑآن ہڑتوم آ کنڈآتا تعلقداری تا پین سوگوی کن ہڑتوم آ کنڈآتے موقع فراوان مریک۔