پاکستان اٹی بینک آف چائنا نا بناء اسہ تاریخی ءُ گام اسے، بینک آف چائنا پاک چین اقتصادی راہداری نا داتاریخی حقیقت نا درشانی ءِ کہ پاکستان و چین تینا و داڈیہہ نا قسمت ءِ بدلیفنگ کن ہرا اسیجائی تغ ءِ خناسر او حقیقت نا دروشم اٹ مون آ بننگ ءِ
اسلام آباد۔ 07 نومبر (اے پی پی) صدر مملکت ممنون حسین پارینے کہ پاکستان تینا جغرافیائی محل و وقوع نا سوب آن ڈیہہ نا اقتصادی سرجز آتا فطری بنجاءِ ہرانا سرسہبی کن پاکستان اٹی بینک آف چائنا نا آپریشن نا بناء اسہ تاریخی ءُ گام اسے ہرانا حکومت پاکستان است انا ھب اٹ خیرمقدم ءِ کیک۔ صدر مملکت داہیت ءِ پاکستان اٹی بینک آف چائنا نا آپریشن تا بنائی دود آن تران کرسا پارے۔ اوداکان پد تختی نا نقاب کشائی ءِ کرسا بینک انا آپریشن تا ہم بناءِ کرے۔ دود آن گورنر اسٹیٹ بینک طارق باجوہ ، چین نا قائم مقام سفیر جاؤ جے اون و بینک آف چائنا نا چیئرمین چن سے کنگ ہم تران کریر۔ اوپارے کہ پاک چین اقتصادی راہداری ڈٹ انا بھرم آک بھاز زوت الس اسکان سرمننگ نا بناءِ کیرہ ہراٹی ہڑتوم آ ملک آتا نیام اٹ پرجوش سیاسی و اقتصادی تعلقداری تیٹی ودکی بریک۔ صدر مملکت پارے کہ پاکستان زرکاری کن گچین ءُ ملک اسے ہراڑآن ہندی و جہانی زرکارآک بایدے فائدہ ہرفر۔ اوپارے کہ کاروباری فضاسازگار ءِ و وطن عزیز نا بے کچ سوگو و وسیع صارف مارکیٹ زرکارآتے تینا کنڈآ متوجہ کننگ ءِ۔ بینک آف چائنا نا چیئرمین چن سے کنگ پارے کہ پاکستان و چین اقتصادی راہداری نا کمک اٹ مچ آ دیہہ نا شونہالی کن کاریم کننگ ءُ وخت اس کہ چین نا قائم مقام سفیر پارے کہ پاکستان نا معیشت اٹ ترندی اٹ گچینی بننگ ءِ۔ بینک آف چائنا نا چیئرمین چن سے کنگ تینا تقریر نا ایسر اٹ بابائے قوم قائد اعظم محمد علی جناح ءِ زبردست خراج عقیدت پیش کرے و پارے کہ او فرمائفیسس کہ شونداری و شونہایل نا مزل سیوت نا کمک اٹ دوئی کننگ مریک۔ پاکستان و چین اقتصادی راہداری نا سرسہبی کن اونا تعلیم آتیا عمل کننگ ءُ۔ صدر مملکت بینک آف چائنا ءِ پاکستان اٹی باقاعدہ کاروبار بناء کننگ آ مبارکبادی تس و اومیت نا درشانی ءِ کرے کہ ہڑتوم آ ملک آتا نیام اٹ دا بینک رابطہ غاتے پین سوگو جوڑ کننگ اٹی تینا کڑد ءِ ادا کیک۔
