اسلام آباد۔ 07 نومبر (اے پی پی) اسپیکر قومی اسمبلی سردارایاز صادق نا کماشی ٹی پارلیمانی راہشون تا دیوان اس سے شنبے نادے داڑے مس ہراٹی حلقہ بندی تا بابت دستور اٹی آئینی ترمیم نا جاچ ءِ ہلنگا۔ دیوان اٹی 2017 ء نا مردم شماری نا بنائی نتیجہ غاتا رداٹ پوسکن آ حلقہ بندی تیا سلابت کننگا۔ دیوان اٹی پیپلزپارٹی نا پارلیمانی لیڈر سید نوید قمر، جمعیت علماء اسلام (ف) انا ملک امیر زمان، شیخ رشید احمد، مسلم لیگ (ن) نا کنڈآن خواجہ سعد رفیق ، لیفٹیننٹ جنرل (ر) عبدالقادر بلوچ ، زاہد حامد آن بیدس الیکشن کمیشن ، وزارت کانود، وزارت شماریات ، نادرا و ایلو تعلقدار ادارہ غاتا بڑزکو کمامدارآک ہم ساڑی ئسر۔ دیوان (اینو) چارشنبے نادے 11بجہ غا دُوارہ اسپیکر قومی اسمبلی سردار ایاز صادق نا کماشی ٹی مریک۔
