اشددرکار خراج اصلاحات درستی راستی کرفنگ، خراج بنداو ءِ ودفنگ، خراج ہلنگ نا نظام ءِ آسان جوڑ کننگ و آڈیٹنگ سسٹم اٹی معیاری گچینی اتنگ نا بارواٹی ہرفوک آ چندی گام گیج آتا بارواٹی بریفنگ تننگا
اسلام آباد۔ 02نومبر (اے پی پی) وزیراعظم شاہد خاقان عباسی خراج بنداو ءِ ودفنگ کن گچین گام گیج ہرفنگ نا گرج ءِ تالان کرسا فیڈرل بورڈ آف ریونیو (ایف بی آر) ءِ پارت کرینے کہ غٹ کڑدہ غاتا سلابت اٹ منظم و وسیع بنداو اصلاحات درستی راستی کرفنگے، ہر کس ءِ خراج ادا کننگ و تینا قومی فرض ءِ ادا کننگ نا کنڈآ راغب کننگے۔ اوداہیت ءِ پنچ شنبے نادے وزیراعظم آفس اٹی خراج اصلاحات آتا بارواٹی دیوان نا کماشی ءِ کرسا پارے ہراٹی وزیراعظم نا خصوصی کمکار ہارون اختر خان، وزیراعظم نا خصوصی کمکار مفتاح اسماعیل ، خراج اصلاحات کمیشن نا باسک و سینئر کمامدارآک ساڑی ئسر۔ وزیراعظم ءِ اشددرکار خراج اصلاحات درستی راستی کرفنگ، خراج بنداو ءِ ودفنگ، خراج ہلنگ نا نظام ءِ آسان جوڑ کننگ و آڈیٹنگ سسٹم اٹی معیاری گچینی اتنگ نا بارواٹی ہرفوک آ چندی گام گیج آتابارواٹی بریفنگ تننگا۔ محصول آتا ہلنگ نا نظام ءِ زیات مستعد و دوستانہ جوڑ کننگ کن چندی سلاہ تیا ہم سرجم سجفنگا۔ ملک انا خراج تروک آتا آسراتی کن ایف بی آر نا کنڈآن ہرفوک آ گام گیج آتیا ہم سجفنگا۔ وزیراعظم پارت کرے کہ نادرا ، بینک، صوبائی کمامدار و یوٹیلٹی خذمت کروک آ تعلقدار ادارہ غاتون ایف بی آر نا دمدستی رابطہ استوار مننگ نا عمل بایدے ترند مرے تانکہ سسٹم ءِ زیات مستعد جوڑ کننگ مرے۔ وزیراعظم پارے کہ خراج بنداو ءِ ودفنگ کن گام گیج بایدے ہرفنگے تانکہ خراج تروک و خراج ہلوک آتا نیام اٹ پت انا کمتی مر مرے۔ اوپارے کہ ہر اسٹ ءِ تینا خراج ادا کننگ ودابابت تینا قومی زمواری نا ادائیگی نا است بڈی ءِ بایدے کروئی مرے۔ اوپارت کرے کہ خراج ریٹرن فارم آتے پین آسان جوڑ کننگے و لس شاری و خراج ادا کروک آتا آسانی کن ہروڑآسراتی تننگے۔ وزیراعظم ایف بی آر ءِ پارت کرے کہ جزوی اپروچ آن بیدس غٹ کڑدہ غاتا سلابت اٹ منظم و وسیع بنداو اصلاحات کننگے۔
