راولپنڈی۔ 02نومبر (اے پی پی) پاک فوج انا سروک جنرل قمر جاوید باجوہ پارینے کہ راجی و اقتصادی میدان اٹی حکومت کن شونداری بشخ اٹی کمکاری نا ذریعہ آپریشنل فائدہ غاتے سوگوی تننگ انگ ءِ وخت اس کہ بلوچستان اٹی داوڑنا راجی و اقتصادی شونداری آ زیات چکار کننگک۔ او پنچ شنبے نادے 205می کورکمانڈر کانفرنس آن تران کریکہ۔ پاک فوج انا شعبہ تعلقات عامہ (آئی ایس پی آر) نا رداٹ آرمی چیف جنرل قمر جاوید باجوہ نا کماشی ٹی اڈ ہلوک آ کور کمانڈر کانفرنس اٹی سیکورٹی نا جم اٹنگا حالیت، انسداد دہشت گردی آپریشن تا پیش رفت نا جاچ ءِ ہلنگا۔ اوغان و امریکی کمامدارآتون اوڑدہی نا رداٹ ہم سیکورٹی معاملہ غاتا ہم جاچ ءِ ہلنگا۔ کانفرنس اٹی ملک اٹی جاری انسداد دہشت گردی آپریشن آتا پیش رفت آ ہم سجفنگا و آپریشن آتیٹی داوخت اسکان دوئی مروک آ سرسہبی تیا است جمی نا درشانی ءِ کننگا۔
