اسلام آباد۔ 02نومبر (اے پی پی) صدر مملکت ممنون حسین پارینے کہ پاکستان غٹ سنگت و برادر ملک آتون ہڑتوم آ کنڈآتا تعلقداری تا مون آ دننگ نا خواہندار ءِ، پاکستان معیشت تون اوار غٹ بشخ آتیٹی شونداری کرینے، حکومت نا مناسب پالیسی تا سوب پاکستان نا معیشت سہی سمت آ روان ءِ ، آجو زرکارپالیسی نا سوب پاکستان سویلی ایشیاء ٹی زرکاری کن گچین ءُ ملک اسے ہراڑآن جہانی زرکارآک پبی فائدہ ہرفنگ کیرہ۔ اوداہیت ءِ پنچ شنبے نادے نائیجیریا نا ہائی کمشنر ، سوئٹزرلینڈ، متحدہ عرب امارات ، بوسنیا ہرزیگوینیا و مصر انا سفیر آتون جتا جتا مروک آ اوڑدہی ٹی پارے ہراک ایوان صدر اٹی اڈہلوک آ دود اٹی اودے تینا سفارتی سند آتے پیش کریر۔ صدر مملکت پارے کہ پاکستان غٹ سنگت و برادر ملک آتون ہڑتوم آکنڈآتا تعلقداری تے ودفنگ نا خواہندارءِ۔ اواومیت نا درشانی ءِ کرے کہ پندار سفیر ہڑتوم آ کنڈآتا تعلقداری خاص وڑاٹ واپار و زرکاری ٹی ودکی کن گام گیج کیرہ۔ صدر مملکت پارے کہ پاکستان امن نا اصول آتیا سلوک ءِ و جہانی کہول آ اسہ اہم ءُ و زموار ءُ ملک اسے نا حیثیت تخک۔ اوپارے کہ پاکستان دہشت گردی و انتہاء پسندی آن غٹ آن زیات زہمی مروک آ ملک ءِ و او دہشت گردی نا برخلاف بے پناہ قربانی تس ہرادے جہانی برادری بایدے امنا کے۔ اوپارے کہ دہشت گرد آتا برخلاف پبی آپریشن جاری ءِ و آخیریکو دہشت گرد نا چٹفنگ اسکان داآپریشن برجاسلک۔ صدر مملکت ممنون حسین سفیر و ہائی کمشنر آتے پاکستان اٹی اوفتا پوسکن تعیناتی آ مبارکبادی تس و پاکستان اٹی آرام دہ و خوشگوار اڈکننگ کن نیک است خواہی تا درشانی ءِ ہم کرے۔ داکان مست پندار سفارت کار آتے ایوان صدر نا بنجائی درگہ غا خاص ءُ بھگی سے ٹی اتنگا۔ داوخت آ پاکستان و تعلقدار ملک آتا قومی ترانہ ءِ خلنگا و گارڈ آف آنر پیش کننگا۔ سفارتی سند پیش کروک آتیٹی نائیجیریا نا ہائی کمشنر میجر جنرل (ر) اشیمیو ادیبایواولینی و سوئٹزر لینڈ انا سفیر تھامس کولی، متحدہ عرب امارات نا حماد عبید ابراہیم سام الزابی ، بوسنیا ہرزیگوینیا نا بریگیڈیئر جنرل (ر) ثاقب فورق و مصر انا سفیر احمد فضل یعقوب اوار ئسر۔
