اعزاز احمد چوہدری نا امریکی کانگرس نا باسک سینیٹر جونی اساکسن و جوئے ولسن تون جتا جتا اوڑدہی

اسلام آباد۔ 02نومبر (اے پی پی) امریکہ ٹی پاکستان نا سفیر اعزاز احمد چوہدری پنچ شنبے نادے واشنگٹن اٹی امریکی کانگرس نا باسک ریپبلکن پارٹی نا اِرا سینئر راہشون سینیٹر جونی اساکسن و جوئے ولسن تون جتا جتا اوڑدہی کرے۔ سینیٹر جونی سینیٹ نا خارجہ امور کمیٹی نا باسک و اخلاقیات و رضاکار نا امور نا بابت سینیٹ کمیٹی نا چیئرمین ہم ارے وخت اس کہ جوئے ولسن ایوان نمائندگان نا باسک آن بیدس خارجہ امور و آرمڈ سروسز کمیٹی تیٹی ہم خذمت سرانجام تننگ ءِ۔ سفیر اعزاز احمد چوہدری اوڑدہی ٹی کانگرس باسک آتے پاک امریکہ تعلقداری تا ساڑی آ رداٹ تازہ انگا پیش رفت آن معلومدار کرے۔ او کانگرس باسک آتا چکار ءِ پاکستان نا اقتصادی جاچ و سیکورٹی نا حالیت آتیٹی نمان گچینی نا کنڈآ مبذول کرفے۔ ہراڑآن ہڑتوم آ ملک آتا نیام اٹ کاروباری و واپاری کمکاری ٹی پین ودکی مریک۔ سے شنبے نادے نیویارک اٹی المناک واقعہ غا است ہسونی نا درشانی ءِ کرسا پاکستانی سفیر پارے کہ دہشت گردی نا داوڑنا کارروائیک ننے دا اسیجائی چیلنج آتا یات دہانی کرفرہ ہراڑتون ہڑتوم آ ملک آک مون تننگ ءُ۔ اوپارے کہ پاکستان دہشت گردی و شدت پسندی نا برخلاف جنگ اٹی بھلو سرسہبی اس دوئی کرینے۔ اوداعزم انا درشانی ءِ کرے کہ پاکستان سویلی ایشیاءِ دہشت گردی آن پاک کننگ کن امریکہ تون کاریم ءِ برجاتخک۔