اسلام آباد۔ 02نومبر (اے پی پی) سویلی افریقہ نا بڑزکو کہولی ڈل وزیر پبلک انٹر پرائز نا سروکی ٹی وزارت دفاع نا دورہ ءِ کریرو وزیر دفاعی پیداوار رانا تنویر حسین تون اوڑدہی کریر۔ بنجائی وزیر پارے کہ پاکستان سویلی افریقہ نا تعلقداری تے قدر انا نظر اٹ ہرک و اوفتے آخبت اٹ مون آ دننگ نا خواہندار ءِ ۔ وزیر دفاع ہڑتوم آ ملک آتا نیام اٹ دفاعی صنعت نا کمکاری نا اہمیت ءِ نمان کرے و اسیجائی پیداوار آ زور شاغا۔ اوہڑتوم آ ملک آتیٹی دفاعی تعلقداری تے پین سوگو جوڑ کننگ آ زور شاغا۔ بنجائی وزیر پارے کہ شون ہلوک ءُ ملک اسے نا مقابلہ ٹی پاکستان نا دفاعی صنعت بھاز سوگو ءِ۔ ہڑتوم آ ملک آتا وزیر آتا ہڑتوم آ کنڈآتا تین پہ تینی اوڑدہی ہم مس، ہڑتوم آ کنڈآن دفاع ٹی سوگو تعلقداری تا وارخواہی و تین پہ تینی کمکاری آ ہیت وگپ مس۔ پاکستان ایروناٹیکل کمپلیکس کامرہ ہم مہمان وزیر ءِ بریفنگ تس و دانا ڈٹ آتا بارواٹ پارے۔ مہمان وزیر بنجائی وزیر نا میزبانی نا منت واری ءِ ہرفے و پارے کہ تین پہ تینی ہیت وگپ آن ہڑتوم آ کنڈآتا تین پہ تینی تعلقداری تا مون آ دننگ اٹ کمک رسینگک و دفاعی ڈٹ و دفاعی صنعت آتیٹی کمکاری ءِ مون آ دننگ دوئی مریک۔
