قومی اسمبلی نا حلقہ بندی تا رداٹ آئینی ترمیم نا مسودہ تیار، اینو(پنچ شنبے) نادے آ قومی اسمبلی نا دیوان اٹی پیش کننگک
اسلام آباد۔ یکم نومبر (اے پی پی) پوسکن آ مردم شماری نا رداٹ قومی اسمبلی نا حلقہ بندی تا رداٹ آئینی ترمیم نا مسودہ ءِ تیار کننگانے ہرادے اینو(پنچ شنبے) نادے قومی اسمبلی نا دیوان اٹی پیش کننگک۔ دافیصلہ قومی اسمبلی ٹی پارلیمانی سرکڑدہ غاتا دیوان اٹی کننگا ہرا چارشنبے نادے آ اسپیکر قومی اسمبلی سردارایاز صادق نا کماشی ٹی مس۔ دیوان اٹی بنجائی وزیر کانود زاہد حامد ، بنجائی وزیر پارلیمانی امور شیخ آفتاب احمد، عوامی نیشنل پارٹی نا راہشون حاجی غلام احمد بلور، جماعت اسلامی نا صاحبزادہ طارق اللہ، جمعیت علماء اسلام (ف) انا اکرم خان درانی، مسلم لیگ (ف) انا غوث بخش مہر، پختونخوا ملی عوامی پارٹی نا محمود خان اچکزئی، پاکستان پیپلزپارٹی نا سید خورشید احمد شاہ و سید نوید قمر، متحدہ قومی موومنٹ نا ڈاکٹر فاروق ستار، پاکستان تحریک انصاف نا شاہ محمود قریشی، قومی وطن پارٹی نا سروک آفتاب احمد خان شیر پاؤ تون اوار سیکرٹری کانود، سیکرٹری الیکشن کمیشن بابر یعقوب ، چیئرمین نادرا، ادارہ شماریات پاکستان نا آفیسر و ایلو تعلقدار کمامدارآک ساڑی ئسر۔ دیوان اٹی الیکشن کمیشن و نادرا نا کمامدارآک ساڑی مروک آتے درکار حساب و کتاب ءِ پیش کریر و پارلیمانی سرکڑدہ غاتے پوسکن آ حلقہ بندی تا بارواٹ سرجمی اٹ بریفنگ تننگا۔ دیوان آن پد میڈیا تون ہیت وگپ کرسا اسپیکر قومی اسمبلی پارے کہ پوسکن آ حلقہ بندی تا بابت مسودہ کانود ءِ گڈیکو دروشم اس تننگانے ہرادے قومی اسمبلی نا دیوان اٹی پیش کننگک و اوکان پد سینیٹ آن دانا منظوری ءِ ہلنگک۔ اوپارے کہ اسہ دے اس مست ہم دیوان اٹی قومی اسمبلی نا 272جنرل نشست آتے برقرار کننگ آ امنا کننگاسس، اینو دا معاملہ غا پین سلابت مس و مسودہ کانود ءِ گڈیکو دروشم اس تننگانے۔ اوپارے کہ پوسکن آ حلقہ بندی تا رداٹ خیبر پختونخوا ٹی قومی اسمبلی نا 4جنرل و اسہ زالبول نشست اسے نا ودکی مریک، صوبہ ٹی قومی اسمبلی نا 39 جنرل و زالبول نا 9 مخصوص نشست مریک وخیبر پختونخوا ٹی قومی اسمبلی نا کل نشست آتا کچ 48مریک۔ اوپارے کہ بلوچستان اٹی اِرا جنرل و زالبول نا اسہ نشست اسے نا ودکی مریک و صوبہ ٹی قومی اسمبلی نا نشست آتا کل کچ 20مریک۔ بنجا نا بست و بندی علاقہ جات و سندھ انا نشست آتیٹی ہچءُ ردوبدل اس مفک۔ اسپیکر قومی اسمبلی پارے کہ بنجائی دارالحکومت اٹی قومی اسمبلی نا اسہ نشست اسے نا ودکی ءِ کننگک، اسلام آباد آن داسہ قومی اسمبلی نا مسہ نشست مریرہ۔ ہنداوڑ جم وڑاٹ قومی اسمبلی نا جنرل نشست آتا کچ 272و 60 مخصوص نشست آتیان پد داکچ 332مریک۔ اوپارے کہ قومی اسمبلی نا نشست آتا کچ اٹی ودکی آبادی نا بنداو آمریک۔ 7 لکھ 80 ہزار نا آبادی کن قومی اسمبلی نا اسہ نشست اس مریک۔ اوپارے کہ دا چرجوئی این اے ون آن بناء کیک، داٹی مارجن آف ایر رپلس مائنس 10 مننگ کیک۔ اسہ سوج اسے آ اوپارے کہ حلقہ بندی تا بابت غٹ سیاسی جماعت آتا امنائی ارے، الیکشن کمیشن تینا پروسیس نا بناءِ کرینے و دارداٹ او زیات سرجم وڑاٹ معلومدار کیک۔ دیوان آن پد میڈیا نا نمائندہ غاتون ہیت وگپ کرسا قومی اسمبلی ٹی قائد حزب اختلاف سید خورشید شاہ پارے کہ پوسکن آ حلقہ بندی تیان ہچ ءُ فائدہ و نسخان اس مفک و ضمنی گچین کاری ہم پوسکن آ حلقہ بندی تا رداٹ مریرہ۔ پاکستان تحریک انصاف نا راہشون شاہ محمود قریشی داوخت آ میڈیا تون ہیت وگپ کرسا پار ے کہ پوسکن آ حلقہ بندی تیان قصور، اوکاڑہ، ساہیوال ، اٹک، شیخوپورہ وپاک پتن نا ضلع غاتیٹی قومی اسمبلی نا اسہ اسہ نشست کم وخت اس کہ ڈیرہ غازی خان ، راجن پور، مظفر گڑتھ ، لاہور نا ضلع غاتیٹی قومی اسمبلی نا اسہ اسہ نشست ودک۔ اوپارے کہ تحریک انصاف سلابت اٹ فیصلہ کرے کہ الیکشن آک بایدے بروخت مریر و پوسکن آ حلقہ بندی تا گام گیج الیکشن ءِ بروخت مننگ ءِ المی جوڑ کیک۔
