اسلام آباد۔ 31اکتوبر (اے پی پی) ڈپٹی چیئرمین پلاننگ کمیشن سرتاج عزیز پارینے کہ ٹرانسپورٹ و مواصلات نا بشخ ملک انا راجی و اقتصادی شونداری ٹی کلیدی وڑنا کڑد اداکننگ ءِ، پیداوار اٹی ودکی کن گچین و فعال ٹرانسپورٹ نا نظام و پوسکن آ بنداوی ڈھانچہ لازم وملزوم ءِ۔ پلاننگ کمیشن ملک اٹی ٹرانسپورٹ و مواصلات ءِ پوسکن آ گرج آتون ہم گرنچ کننگ کن اولیتی بنداو تیا ڈٹ بندی کننگ ءِ ہرانا دوررس نتیجہ دوئی مننگ ءِ۔ ساڑی حکومت مواصلات نا نظام ءِ گچین جوڑ کننگ کن اسہ ٹھوس پلاس اسے آ کاریم کننگ ءِ۔ داخیال آتا درشانی ءِ او سی ڈی ڈبلیو پی نا دیوان آن تران اٹی کرے۔ سنٹرل ڈویلپمنٹ ورکنگ پارٹی نا دیوان اٹی ٹرانسپورٹ و مواصلات نا بابت 193ارب روپئی نا ڈٹ آتا منظوری ءِ تس۔ دیوان اٹی مواصلاتی ڈویژن ڈیزائن، ٹینڈرنگ نا کمک و مالاکنڈ سرنگ ڈٹ آتا جوڑ جاڑ کن 17ارب78 کروڑ 89 لکھ روپئی نا خڑچ انا ڈٹ پیش کرے، نظرثانی ڈٹ اٹی 9.732کلومیٹر روڈ، 4لین روڈ، و2ٹنل اوار ءُ ہرادے سی ڈی ڈبلیو پی نا دیوان مون آ منظوری کن ایکنک آ گدریفے۔ دیوان اٹی وزارت ریلوے گوادر اٹی کنٹینرز یارڈاسٹیشن و کوسٹل ہائی وے آن بندرگاہ اسکان ریلوے لین اکن ڈغار نا دوئی کننگ کن 5ارب99 کروڑ 96لکھ روپئی نا خڑچ انا ڈٹ پیش کرے ہرادے سی ڈی ڈبلیو پی منظور کرے۔ دیوان اٹی پاکستان میری ٹائم سیکورٹی ایجنسی کن 6بھلو سلہہ بردار کشتی(ویسلز) آتا ہلنگ کن 15ارب 94کروڑ 86لکھ روپئی نا خڑچ انا ڈٹ پیش کرے ہرادے دیوان اٹی منظور کننگا۔ بلوچستان نا صوبائی حکومت کلی سرکار عبداللہ نا مون انگا ٹل تفتان بازار نا جوڑ جاڑ و کلی عبداللہ رحیم آن ضلع چاغی اسکان روڈ انا جوڑ جاڑ کن 16کروڑ 97 لکھ 57ہزار روپئی نا خڑچ انا ڈٹ پیش کرے ہرادے دیوان نامنظور کرے۔
