اسلام آباد۔ 31اکتوبر (اے پی پی) صدر مملکت ممنون حسین پارینے کہ سری لنکا ، پاکستان نا خڑک انگا سنگت ملک ءِ و ہڑتوم آ ملک آتا نیام اٹ واپاری کچ اٹی پین ودکی نا گرج ءِ۔ داہیت ءِ او سری لنکا ٹی پاکستان نا پندار ہائی کمشنر میجر جنرل (ر) شاہد احمد حشمت تون ہیت وگپ کرسا پارے ہراسے شنبے نادے ایوان صدر اٹی صدر مملکت تون اوڑدہی کرے۔ صدر مملکت پارے کہ زرکاری نا بشخ اٹی سری لنکا تون زیات آن زیات کمک کننگے و ہموجاگہ نا زرکار آتے پاکستان اٹی زرکاری نا ترغیب تننگے تانکہ پاکستان و سری لنکا نا نیام اٹ تعلقداری تے پین مون آ دننگ مرے۔ اوپارے کہ پاکستان اٹی غٹ مذہب آتا خلقت ءِ آجوئی دوئی ءِ ہنداخاطران پاکستان و سری لنکا نا نیام اٹ مذہبی سیل وسوات نا مون آ دننگ آ چکار کننگے۔ صدر مملکت پارے کہ بدھ مت نا مذہبی سیل وسواتی تے پاکستان اٹی ہروڑنا آسراتی فراوان کننگ انگ ءِ تانکہ سیل وسوات نا بشخ ءِ مون آ دننگ مرے۔ صدر مملکت پارے کہ پاکستان اٹی آب اٹنگا تعلیم نا گمان ساڑی ارے ہراڑآن سری لنکا نا طالب علم آک زیات آن زیات فائدہ ہرفنگ کیرہ۔
