قومی شونداری و معیشت نا سوگوی کن راج انا ہر بندغ تینا لائخی ناوڑاٹ کاریم کے، وزیراعظم یوتھ ووکیشنل پروگرام داچرجوئی نا کڑی اسے
اسلام آباد۔ 30اکتوبر (اے پی پی) صدر مملکت ممنون حسین پارینے کہ قومی شونداری و معیشت نا سوگوی کن راج انا ہر بندغ تینا لائخی نا وڑ اٹ کاریم کے، وزیراعظم یوتھ ووکیشنل پروگرام دا چرجوئی نا اسہ کڑی اسے ہرانا سرسہبی آن ورناک تینا لائخی تا وڑاٹ قومی شونداری نا عمل اٹ پبی وڑاٹ شریک مننگ کیرہ۔ اوداہیت ءِ نیوٹیک اٹی انعام آتا بشخ وپانٹ نا دود آن تران کرسا پارے۔ دود آن بنجائی وزیر تعلیم و کسبی امور انجینئر بلیغ الرحمان ، ایگزیکٹو ڈائریکٹر نیوٹیک (NAVTTC) ذوالفقار احمد چیمہ ئسک ہم تران کریر۔ صدر مملکت گچین کارکڑد نشان تروک آ ورناتے ٹی انعام بشخ وپانٹ کرے۔ صدر ممنون حسین پارے کہ وزیراعظم یوتھ اسکل ڈیویلپمنٹ پروگرام نا اڈ تننگ نا مسخت پاکستانی ورناتے اوفتا لائخی تا وڑاٹ تربیت ترسا روزگار نا بھلو وارخواہی اس فراوان کننگ نا ءِ۔ اوپارے کہ ہراراج پوسکن آ عہد نا گرج آتے پہہ مرسا افرادی واک ءِ تربیت تس، شونہالی اوفتا مقدر جوڑ مس۔ اوپارے کہ حکومت پاکستانی ورناتا لائخی تے تالان کننگ کن گچین ءُ پروگرام اس تیار کرینے ، داسہ ورناتا دازمواری ءِ کہ دا گچین انگا موقع ءِ دُوآن پیش تمنگ کن ہلیپس۔ صدر مملکت پارے کہ ورناک کسب کار قومی معیشت اٹی مخ انا ملی نا حیثیت تخرہ ہرا تینا دے و نن انا خواری اٹ تینا خاہوت ءِ ہی آخا بلکن مچ آ قوم انا شونہالی و شونداری و سوگوی نا کمک جوڑ مریرہ۔
