حکومت قومی اسمبلی نا حلقہ بندی تا بارواٹ پارلیمنٹ اٹی پیش کروک آ بل انا بارواٹی اہم سیاسی جماعت آتون سلابت کرینے، وزیر کانود زاہد حامد

اسلام آباد۔ 29اکتوبر (اے پی پی) وزیر کانود زاہد حامد پارینے کہ حکومت قومی اسمبلی نا حلقہ بندی تا چرجوئی ٹی پارلیمنٹ اٹی پیش کروک آ بل انا بارواٹی اہم سیاسی جماعت آتون سلابت کرینے۔ ریڈیو پاکستان نا رداٹ پسرور نا علاقہ بڈیانہ ٹی صحافی تتون ہیت وگپ کرسا اوپارے کہ پاکستان مسلم لیگ (ن) نا حکومت تینا مدت ءِ پورو کیک۔ پوسکن آ حلقہ بندی تا بابت سوج آ بنجائی وزیر پارے کہ حکومت دا چرجوئی ٹی موثر سلابت آن پد بروک آ ہفتہ پارلیمنٹ اٹ بل اس پیش کیک ۔ وزیر کانود پارے کہ 2017ء نا قومی مردم شماری آن پد پوسکن آ حلقہ بندی المی ءِ۔ اوپارے کہ داچرجوئی ٹی غٹ جماعت آتا اسیجائی دیوان اس زوت مریک۔