اسلام آباد۔ 29 اکتوبر (اے پی پی) صدر آزاد جموں و کشمیر سردار مسعود خان پارینے کہ مقبوضہ کشمیر نا خلقت تنیا اف، و نن اوفتے تون تفوک اُن۔ آزاد کشمیر و پاکستان نا الس تون اوار غٹ پردیسیک کل اوفتے تون تفوک ءُ۔ یوم سیاہ نا بابت نجی ٹی وی چینل ءِ خصوصی انٹرویو ترسا اوپارے کہ نن مظلوم کشمیری تا دڑد ءِ پورو وڑاٹ بشخنگ کپنہ ولے اوفتے باوری تننگ خوانہ کہ نن اخیریکو دم اسکان مقبوضہ کشمیر نا الس تون تفنہ و نن غٹ جہانی ایوان تیٹی توار ءِ چست کرسا کینہ کہ کشمیری تے اوفتا حق خودارادیت ءِ تننگے۔ اوپارے کہ کشمیری تتون مروک آ بیدادی تا دمدستی ازالہ ءِ کننگے۔ اوپارے کہ کشمیری تا کمک کن جہانی برادری وانسانی حق انا جہانی تنظیمک بایدے مون آ بریر و تینا زمواری تے اوفتے بایدے جوانی اٹ پورو کروئی مرے۔ صدر آزاد کشمیر تاسف نا درشانی ءِ کرسا پارے کہ جہانی برادری و انسانی حق انا جہانی تنظیمک تینا زمواری تے پورو کتوس و دوہرا موقف ءِ اختیار کرینو۔ ہراکشمیری تا بنداوی حق انا برخلاف ءِ۔
