کشمیریک حریت پسندی نا تاریخ نا لازوال ءُ مثل اس جوڑ مسنو، ہر پاکستانی کشمیر نا آجوئی نا وکیل ءِ
اسلام آباد۔ 27اکتوبر (اے پی پی) وزیر مملکت اطلاعات ، نشریات و قومی میرات مریم اورنگزیب کودک کشمیری شاری تیا بھارتی بیدادی نا مذمت ءِ کرسا صاف کرینے کہ پاکستان تینا کشمیری ایلم و ایڑتا آجوئی نا حق انا دوئی کننگ اسکان اوفتا سیاسی، اخلاقی و سفارتی مخ تفی ءِ برجاتخک، یوم سیاہ نا وخت آ تینا کلہو اٹی وزیر مملکت پارے کہ اینو نا دے اقوام متحدہ آن سوج کیک کہ مظلوم ، کودک و بھارتی ریاستی دہشت گردی نا گواچی کشمیری تتون ہراوخت آ اوفتا وعدہ غاک پورو مریرہ؟ کشمیری تے اوفتا حق ترفنگ آن بیدس جہانی ادارہ و دنیا تینے مہذب و انصاف پسند پارفنگ نا حق تخپک ، بھارتی فوج انا جنت نا ڈغار اٹی ساڑی گری جہانی ادارہ و مہذب دنیا کن چیلنج اسے۔ جمعہ نا دے جاری بیان اٹی وزیر مملکت مریم اورنگزیب اہل کشمیر تون پورو یکجہتی نا درشانی ءِ کرسا پارے کہ پاکستان تینا کشمیری ایلم و ایڑتا آجوئی نا حق انا دوئی کننگ اسکان اوفتا سیاسی ، اخلاقی و سفارتی مخ تفی ءِ برجاتخک۔ اوپارے کہ نڈر کشمیریک شش دہائی آن زیات وخت اٹی تینا آجوئی نا حق اکن عظیم ءُ قربانی تسنو ہرافتیا اوفتے سلام پیش کینہ۔ اوپارے کہ اینونادے اقوام متحدہ آن سوج کیک کہ مظلوم ، کودک و بھارتی ریاستی دہشت گردی نا گواچی کشمیری تتون اوفتا وعدہ غاک ہراوخت پورو مریرہ؟ اوپارے کہ لمہ ، ایڑ، مسڑ، چناو ایلم تتون اوار غٹ کشمیریک حریت پسندی نا تاریخ نا لازوال مثل اس جوڑ مسنو۔کشمیر نا آجوئی تقسیم ہند نا بے پورو ءُ ایجنڈااسے، توفک نا زور آ اہل کشمیر نا زبان بندی نا بھارتی تغ ٹکر ٹکر مسنے۔ اوپارے کہ ہرلالچ ءِ لغت خلسا و ظلم انا مقابلہ ءِ کرسا کشمیریک ثابت کرسا نشان تسنو کہ او آجوئی آن کم ہچ ءُ گڑاسے آ راضی مفسہ۔ ہر پاکستانی کشمیر نا آجوئی نا وکیل ءِ، داویل انا ایسری اسکان ڈیہہ ٹی پائیدار امن تغ اس سلک۔ اوپارے کہ وخت مراف ہراتم کشمیر اٹی آجوئی نا دے دے ٹک ایتک۔
