وزیراعظم شاہد خاقان عباسی نا بجلی نا بشخ ءِ تیل آ مبنی پاور پلانٹ آتے مرحلہ وار کم آن کم وخت اٹی گیس آ بدل کننگ نا پارت
اسلام آباد۔ 27اکتوبر (اے پی پی) وزیراعظم شاہد خاقان عباسی بجلی نا بشخ ءِ گیس انا مناسب دستیابی نا پیش نظر تیل آ مبنی پاور پلانٹ آتے مرحلہ وار کم آن کم وخت اٹی گیس آ بدل کننگ نا پارت کرسا پارے کہ دا گام گیج آن نئے بیرہ ملک انا تیل انا درآمدی بل اٹی کمتی بریک بلکن بجلی نا زیات آن زیات دستیابی المی مریک۔ اوداہیت ءِ جمعہ نا دے داڑے وزیراعظم آفس اٹی بجلی نا پیداوار و ملک اٹی طلب ورسد نا جاچ دیوان نا کماشی ءِ کرسا پارے۔ دیوان اٹی بجلی نا پیداوار نا گمانی تخمینہ جات و نومبر 2017ء آن فروری 2018ء اسکان نا بروک آ چار تو تیٹی گمانی طلب نا ہم جاچ ءِ ہلنگا۔ وزیراعظم ءِ پاننگا کہ چندی بشخ وپانٹ کار کمپنی تیان ملوک آ حساب وکتاب نا رداٹ بروک آ چار تُو اٹی اوسط طلب نا تخمینہ کم و ود 14452میگاواٹ ءِ وخت اس کہ آئی پی پیز و پیداواری کمپنی تیان اوسطاََ خالص پیداوار 16865میگاواٹ نا خڑک مریک۔ داہم پاننگاکہ بروک آ چار تُو اٹی گمانی فالتو بجلی 2400 آن 3400 میگاواٹ نا نیام اٹ مریک۔ گمانی حساب وکتاب نا پیش نظر وزیراعظم پارت کرے کہ کم مستعد پاور پلانٹ ءِ مرحلہ وار وڑاٹ بند کننگے و بجلی نا بشخ اکن گیس انا مناسب دستیابی نا پیش نظر کم آن کم وخت اٹی تیل آ مبنی پاور پلانٹ آتے گیس آ بدل کننگ کن ہرکوشست آتے کاریم اٹ اتنگے۔ اوپارے کہ تیل آ مبنی پاور پلانٹ آتا گیس آ بدلی و ساڑی آ پاور پلانٹ آتا کاریم نا کچ اٹی زیات آن زیات ودکی آن نئے بیرہ تیل انا درآمدی بل اٹی کمتی بریک بلکن بجلی نا زیات آن زیات دستیابی ہم المی مریک۔ وزیراعظم داہم پارت کرے کہ نجی بشخ اکن گیس انا دستیابی و زیات آن زیات کاریم اٹ اتنگ ءِ المی جوڑ کننگ کن سنٹرل پاور پرچیزنگ ایجنسی، پرائیویٹ پاور اینڈ انفراسٹرکچر بورڈ و پاکستان ایل این جی ٹرمینلز لمیٹڈ نا نیام اٹ زیات تر رابطہ کاری ءِ المی جوڑ کننگے۔ وزیراعظم پارت کرے کہ دستیاب وسیلہ غاتا پبی کاریم اٹ اتنگ و بجلی نا بشخ اٹی زیات آن زیات مستعدی کن غٹ تعلقدار حلقہ غاتا نیام اٹ رابطہ ٹی ودکی کننگے۔ وزیراعظم پارے کہ پالیسی امور نا بارواٹی فیصلہ التواء نا گواچی بایدے مف انتئے کہ داڈول نا حالیت آتیان بے یخینی فضا و زرکار آتے کن منفی احساس ودی مریک۔ وزیراعظم جاری ڈٹ آتا بروخت پوروی آ زورشاغسا تعلقدار ادارہ غاتا سروک آتے بجلی نا بشخ انا جاری ڈٹ آتا پوروی نا نظام الاوقات پیش کننگ نا پارت کرے۔
