اسلام آباد۔ 27اکتوبر (اے پی پی) چیئرمین سینیٹ میاں رضاربانی وقفہ سوج آتیٹی مذہبی امور، ہاؤسنگ و توانائی نا وزیر آتا ساڑی مفننگ آ ترندی نا درشانی ءِ کرساپارے کہ وزیراعظم اگہ تینا وزارت نا سوج آتا ورندی ءِ تننگ کن بننگ کیک تو وزیر آک انت اکن بفسہ، داچرجوئی بایدے بند مرے۔ جمعہ نا دے ایوان بالا ٹی وقفہ سوج آتیٹی مذہبی امور، ہاؤسنگ و توانائی نا وزیر آتا ساڑی مفننگ آ ترندی نا درشانی ءِ کرے۔ وزارت توانائی نا بابت سوج آک داخاطرآن شینک کننگتوس کہ تعلقدار وزیر نا کنڈآن درخواست بسوسس کہ اوفتے موخر کننگے۔ چیئرمین ہریفے کہ بنجائی وزیر مذہبی امور، وزیر مملکت مذہبی امورو وزیر ہاؤسنگ ہراڑے کن ءُ، وزیر توانائی نا کنڈآن دَرو ہم اسہ معاملہ سے موخر کننگ نا درخواست بسوسس، وزیر مملکت جہازرانی بندرگاہیں چوہدری جعفراقبال پارے کہ وزیر ہاؤسنگ بنوں اٹی اختہ مننگ نا سوب آن بننگ کتو ہراڑآ چیئرمین پارے کہ بنوں ٹی اختہ مننگ داایوان آن زیات اہم اف، وزیر آتا بفننگ نا سوب پارلیمنٹ نا کارروائی ٹی انت کن خلل مننگ ءِ۔ چیئرمین ہریفے کہ وزیر مملکت مذہبی امور ہراڑے کن ءِ تو بنجائی وزیر سیفران عبدالقادر بلوچ ورندی تس کہ اونا بارواٹی معلوم اف۔ چیئرمین پارے کہ تعلقدار وزارت آتا سیکرٹری و وزیر آتے پاننگے کہ دا رویہ قابل قبول اف، اگہ داچرجوئی برجاسلیس تو ولدا رولز انا رداٹ کارروائی کننگک۔
