اسلام آباد۔ 26اکتوبر (اے پی پی) سیکرٹری خارجہ تہمینہ جنجوعہ پارینے کہ پاکستان و پولینڈ نا نیام اٹ اقتصادی و واپاری بشخ آتیٹی تعلقداری تے پین مون آ دننگ نا گرج ءِ ۔ او داہیت ءِ پولینڈ نا نائب وزیر خارجہ مارک میگیؤروفسکی تون ہیت وگپ اٹی پارے، ہراپنچ شنبے نا دے داڑے دفترخارجہ ٹی اوڑتون اوڑدہی کرے۔ سیکرٹری خارجہ ہڑتوم آملک آتا نیام اٹ جم اٹنگا ہڑتوم آکنڈآتا تعلقداری تا ساڑی آ حالیت آتیا است جمی نا درشانی ءِ کرے و پارے کہ ہڑتوم آ کنڈآتا تعلقداری خاص کر اقتصادی و واپاری بشخ آتیٹی کمکاری ءِ پین مون آ دننگ غرض اٹ کوشست آتیٹی ودکی نا گرج ءِ۔ اوپولش نائب وزیر خارجہ ءِ سیکورٹی و انسداد دہشت گردی نا بشخ، اقتصادی شونداری و جمہوری ادارہ غاتا سوگوی ٹی پاکستان نا سرسہبی تا بابت بریف کرے۔ سیکرٹری خارجہ پولش نائب وزیر خارجہ نا چکار ءِ مقبوضہ کشمیر اٹی انسانی حق انا ترندی اٹ بگڑینگوک آ حالیت آتا کنڈآ ہم کرفے و اودے ڈیہہ ٹی امن و سوگوی کن پاکستان نا کوشست آتیان معلومدار کرے۔ پولینڈ نا نائب وزیر خارجہ پارے کہ پولینڈ پاکستان تون تینا تعلقداری تے بھاز اہمیت ایتک و پاکستان تون معیشت ، واپارو زرکاری تون اوار ایلو بشخ آتیٹی کمکاری ءِ پین مون آ دننگ نا خواہندار ءِ۔
