164کلومیٹر مریس گلگت سکردو روڈ 31ارب روپئی نا خڑچ آن جوڑ جاڑ کننگک
شاہراہ قراقرم نا 806کلومیٹر مریس شاہراہ ءِ پنچ مرحلہ غاتیٹی اپ گریڈ کننگ انگ ءِ، خنجراب ۔ رائے کوٹ سیکشن پورو مسنو، عطاء آباد اٹی پنچ سرنگ آتے ہم پورو کننگانے، رائے کوٹ آن تھاکوٹ سیکشن ہنداسال دسمبر اٹی پورو مریک، شاہد اشرف تارڑ
سکردو۔ 25اکتوبر (اے پی پی) وزیراعظم شاہد خاقان عباسی ءِ چارشنبے نادے داڑے نیشنل ہائی وے اتھارٹی نا چیئرمین شاہد اشرف تارڑ گلگت سکردو جگلوٹ روڈ و قطبی علاقہ غاتیٹی شاہراہ تا ایلو ڈٹ آتا بارواٹی سرجم بریفنگ تس۔ داوخت آ گورنر گلگت بلتستان میر غضنفر علی و وزیراعلیٰ حافظ حفیظ الرحمان ، گلگت بلتستان کونسل نا باسک ، بنجائی وزیر مواصلات حافظ عبدالکریم ، وزیر مملکت مواصلات جنید انوار چوہدری، امور کشمیر و گلگت بلتستان نا بنجائی وزیر چوہدری برجیس طاہر ہم ساڑی ئسر۔ چیئرمین این ایچ اے بریفنگ ترسا پارے کہ جگلوٹ سکردو روڈ آ باقاعدہ کاریم نا بناء مسنے۔ اوباوری ترفے کہ دا روڈ تینا تخوک آ وخت اٹ پورو مریک۔ اوقطبی علاقہ خاص کر گلگت بلتستان اٹی شاہراہ تا چندی ایلو ڈٹ آتے مون آ تخا۔ چیئرمین این ایچ اے پارے کہ 164کلومیٹر مریس گلگت سکردو روڈ 31ارب روپئی نا خڑچ آن جوڑ جاڑ کننگک، دا جون 2020 ء اسکان پورو مننگ نا ڈٹ ءِ ولے ننا کوشست ءِ کہ دسمبر 2019 ء اسکان دا اہم ڈٹ ءِ پورو کننگے۔ اوپارے کہ روڈ آ گاڈی تا رفتار ءِ برقرار تخنگ کن 5سرنگ آتا ودکی کننگانے، روڈ انا جوڑ جاڑ نا ڈٹ آن جتا ءُ 5پول ہم جوڑ جاڑ کننگک، دا پوسکن ءُ ڈیلٹا پول ءُ و دافتیا اسہ وخت اٹی اِرا لین پند اٹ ہِننگ نا ہم جاگہ مریک۔ داروڈ انا مرغنی 40فٹ مریک۔ شاہد اشرف تارڑ پارے کہ گلگت بلتستان ءِ ملک انا ایلو بشخ آتون مربوط وڑاٹ ملفنگ کن شاہراہ قراقرم و سی پیک تون اوار چندی ڈٹ آتیا کاریم مننگ ءِ ہراڑآن علاقہ ٹی سیل و سوات تون اوار اوار کاروباری وارخواہی تے ہم مون آ دننگ رسینگک۔ چیئرمین این ایچ اے پارے کہ گلگت۔ جگلوٹ۔سکردو شاہراہ غا اِراکنکریٹ پول آتا جوڑ جاڑ جاری ءِ ۔ ایف ڈبلیو او جوڑ کبو، چلیفبو و گدریفبو نا بنداو آ ڈٹ آ کاریم کننگ ءِ۔ پوروی نا اولیکو 2سال شاہراہ نا بست وبند ایف ڈبلیو تون مریک۔ پوروی نا مسٹ میکو سال شاہراہ ءِ نیشنل ہائی وے اتھارٹی آ گدریفنگک، شاہراہ نا جم اٹنگا مرغنی 9میٹر مریک ہراٹی سائیڈ آ شولڈر و ڈرین اوار ءُ۔ خنجراب۔رائے کوٹ سیکشن پورو مسنو، عطاء آباد اٹی پنچ سرنگ آتے ہم پورو کننگانے، رائے کوٹ آن تھاکوٹ سیکشن ہندا سال دسمبر اٹی پورو مریک۔ تھاکوٹ۔ حویلیاں سیکشن اپریل 2018ء ٹی پورو مریک۔ اوپارے کہ حویلیاں ۔برھان سیکشن نا ہندا سال دسمبر اٹ بناء مریک ، شاہراہ قراقرم نا متبادل کسر ءِ ہم جوڑ جاڑ کننگک ، گلگت آن غذر۔شندور۔مستوج۔بوتی ۔چترال اسکان شاہراہ جوڑ جاڑ مریک۔ اوپارے کہ قطبی علاقہ جات، مظفر آباد ءِ منگلہ و میر پور نا کسرقطبی پنجاپ تون ملفنگک۔
