ریونیو نا تخمینہ 2398ملین، خڑچ آتا تخمینہ 2199 ملین روپئی
سکردو۔ 25اکتوبر (اے پی پی) وزیراعظم شاہد خاقان عباسی نا کماشی ٹی گلگت بلتستان کونسل نا دیوان اٹی مالی سال 2017-18 ء نا کم و ود 2.4 ارب روپئی کچ انا بجٹ نا منظوری ءِ تننگا۔ وزیراعظم ہراگلگت بلتستان کونسل نا چیئرمین ہم ارے، دیوان نا کماشی ءِ کرے۔ دیوان اٹی گلگت بلتستان نا کم و ود 2.4 ارب روپئی نا بجٹ نا منظوری ءِ تننگا۔ گلگت بلتستان کونسل نا پوسکن آ مالی سال اٹی ریونیو نا تخمینہ 2ہزار 398 ملین روپئی وخت اس کہ خڑچ آتا تخمینہ 2ہزار 199 ملین روپئی ءِ۔ کونسل نا پوسکن آ میزانیہ ٹی شونداری بجٹ 1474ملین و غیر شونداری بجٹ 725ملین روپئی ءِ۔ دیوان اٹی گلگت بلتستان کونسل نا وائس چیئرمین و گورنر میر غضنفر علی خان وزیراعلیٰ گلگت بلتستان حفیظ الرحمان ، گلگت بلتستان کونسل نا باسک، و بنجائی وزیر امور کشمیر و گلگت بلتستان چوہدری برجیس طاہر ساڑی ئسر۔ داکان مست وزیراعظم ہراتم اسکردو بالی پٹ آ سرمس تو گورنر میر غضنفر علی خان، وزیراعلیٰ حفیظ الرحمان ، کونسل نا باسک و بڑزکو کمامدارآک اودے بخیر کریر۔
