مسلم لیگ (ن) نا حکومت گلگت بلتستان نا شونداری و الس نا شرحالی کن پرعزم ءِ، پاک چین اقتصادی راہداری آن علاقہ ءِ بے پناہ فائدہ رسینگک
سکردو۔ 25اکتوبر (اے پی پی) وزیراعظم شاہد خاقان عباسی پارینے کہ مسلم لیگ (ن) نا حکومت گلگت بلتستان نا شونداری و الس نا شرحالی کن پرعزم ءِ ، گلگت بلتستان اٹی جمہوری اقدار و جمہوریت نا جوان وڑاٹ تسلسل خوش آئند ءِ، پاک چین اقتصادی راہداری آن علاقہ ءِ بے پناہ فائدہ رسینگک۔ اوداہیت ءِ چارشنبے نادے داڑے گلگت بلتستان کونسل نا 11می بجٹ دیوان نا کماشی ءِ کرسا پارے۔ دیوان اٹی گورنر گلگت بلتستان کونسل نا وائس چیئرمین و گورنر میر غضنفر علی خان وزیراعلیٰ گلگت بلتستان حفیظ الرحمان ، گلگت بلتستان کونسل نا باسک، و بنجائی وزیر امور کشمیر و گلگت بلتستان چوہدری برجیس طاہر ساڑی ئسر۔ اوداہیت آ زور شاغا کہ گلگت بلتستان کونسل نا دیوان تسلسل اٹ بایدے مرے۔ مسلم لیگ (ن) نا حکومت الس نا شرحالی و ملکی شوندساری ءِ اولیت ایتک۔ ننا حکومت نئے بیرہ ڈٹ آتا بناءِ کرے بلکن اوفتے پورو ہم کیک، پاکستان مسلم لیگ (ن) نا حکومت علاقہ نا راجی و معاشی شونداری کن حقی وڑاٹ کاریم کرے۔ وزیراعظم گلگت بلتستان نا بابت پارے کہ دا علاقہ ٹی بے پناہ لائخی ارے ، دا علاقہ ٹی کاروباری سرجز و سیل و سوات نا بھلو وارخواہی اس ساڑی ارے۔ پاک چین اقتصادی راہداری دا علاقہ غان ہم گدرینگک ہراڑآن علاقہ نا بے پناہ فائدہ دوئی مریک و دا فائدہ غاک پیڑی تسکان چلینگسا کیرہ۔ اوپارے کہ گلگت بلتستان نا الس منفرد حیثیت تخوک و پاکستان تون بے پناہ مابت کیرہ۔ وزیراعظم پارے کہ حکومت ہروڑاٹ داعلاقہ نا شونداری و الس نا شرحالی کن پرعزم ءِ۔ اوپارے کہ حکومت دا علاقہ نا شونداری کن ہروڑکمک فراوان کیک و علاقہ نا شونداری کن ہرحداسکان کاہک۔ داکان مست وزیراعظم ہراتم سکردو بالی پٹ آ سرمس تو گورنر میر غضنفر علی خان، وزیراعلیٰ حفیظ الرحمان، کونسل نا باسک و بڑزکو کمامدارآک اودے بخیر کریر۔
