اسلام آباد۔ 24اکتوبر (اے پی پی) قومی سلامتی ناسلاہکار لیفٹیننٹ جنرل (ر) ناصر جنجوعہ تون سے شنبے نادے داڑے پاکستان اٹی ازبکستان نا سفیر فرقات صدیقوف اوڑدہی کرے۔ ہیت وگپ اٹی ہڑتوم آ کنڈآتا تعلقداری تے مون آ دننگ آن بیدس دفاعی کمک و جم اٹنگا علاقائی حالیت و قومی سلامتی نا سلاہکار نا ازبکستان اٹی کانفرنس اٹی شرکت نا بابت معاملہ غاتیا خیال آتا درشانی ءِ کننگا۔ قومی سلامتی نا سلاہکار پارے کہ ازبکستان برادر اسلامی ملک اسے و پاکستان ازبکستان تون خڑکی کمکاری آ مبنی و خوشگوار تعلقداری تے بھاز اہمیت ایتک۔ ازبکستان نا سفیر داوخت آ پارے کہ گدرینگوک آ سال اٹی ازبکستان و پاکستان نا نیام اٹ سفارتی تعلقداری تیٹی نمان و مثبت پیش رفت مسنے۔ ازبکستان پاکستان تون دا تعلقداری تے پین سوگو کننگ و سیاسی ، دفاعی ، اقتصادی ، واپاری ، توانائی ، کشت وکشار و ایلو بشخ آتیٹی کمکاری ءِ ودفنگ نا خواہندار ءِ ۔ ازبک سفیر دہشت گردی نا برخلاف جنگ اٹی پاکستان نا کوشست و سرسہبی تا ستاءِ کرے۔
