پولیو نا برخلاف جنگ اخیریکو مرحلہ ٹی ءِ، حکومت داجنگ ءِ کٹنگ و تینا چناتے پولیو آن رکھ جوڑ کننگ نا پکاعزم کرینے
اسلام آباد۔ 24اکتوبر (اے پی پی) وزیراعظم شاہد خاقان عباسی پارینے کہ پولیو نا برخلاف جنگ اخیریکو مرحلہ ٹی ءِ و حکومت دا جنگ ءِ کٹنگ و تینا چناتے پولیو آن رکھ جوڑ کننگ نا پکا عزم کرینے۔ پولیو نا جہانی دے انا وخت آ تینا کلہو اٹی وزیراعظم داعزم انا درشانی ءِ کرے کہ پولیو وائرس ءِ نن تینا الس و تینا اُراتیٹی بننگ کن ہلیپنہ و آخبت اٹی ننا چناتا زند اٹی پولیو نا خوف مفک، جان جوڑی محافظ آتا کنڈآن بے کچ خواری اٹ مچ آ ملک اٹی اُرااُراغا ہنسا پولیو ویکسین چناتے کُنفنگ آ اوفتا منت واری ءِ ہرفنہ۔ وزیراعظم شاہد خاقان عباسی پارے کہ ملک آن پولیو نا چٹفنگ نا مزل اسکان سرمننگ کن بیرہ اخیریکو مزل آن مون آ ہِننگ داسکان سلوک ءِ و دامرحلہ ٹی ملک انا چندی بشخ آتیان دامرض ءِ چٹفنگ انگ ءِ۔ انسانی مرض آتا چٹفنگ گڑاس بھلا تصور آتیان اسٹ ءِ۔ ہراوڑ داسہ خلقت نا زند آن چیچک کون آ مرض انا خوف چٹانے بالکل ہنداوڑ نن دنیا غان پولیو نا چٹفنگ نا مزل آن زرس مُر اُن۔ مچ آ دنیا ٹی داوخت آ اسہ کروڑ شست لکھ بندغ ءِ پولیو وائرس آن بچفنگ اٹی سرسہبی دوئی کننگانے ہرافتے ٹی پنچ لکھ پاکستانی شاری ہم اوار اریر ۔ اوپارے کہ پاکستان دنیا ٹی ہمومسٹ انگا ملک آتیٹی اوار ءِ ہراڑے پولیو نا وائرس داسکان ساڑی ءِ۔ نن مسہ دہائی نا زرکاری و کوشست آتیان پد نن پاکستان آن داپولیو وائرس نا چٹفنگ نا خڑک اُن۔ اوپارے کہ پولیو نا جہانی دے انا وخت آ ننے داعزم انا درشان ءِ کروئی ءِ کہ نن تینا آبادی یا تینا اُراتیٹی پولیو وائرس ءِ ہچ ءُ جاگہ اس تفنہ اوپارے کہ داوخت آ فائدہ ہرفسا ای جان جوڑی نا محافظ آتا سخت خواری و کوشست آتیا اوفتا منت واری ءِ ہرفیوہ ہرا ملک انا کنڈ کنڈاٹی سرمسنو اوفتا لگن و اہم کڑد انا سوب نن پولیو نا چٹفنگ نا خڑک اُن ۔ اوپارے کہ ای سیاسی جماعت ، مذہبی سکالر، سلہہ بند فوج و سیکورٹی کارندہ غاتاہم منت واری ءِ ہرفیوہ ہرافک دا قومی مشن کن مثالی امداد تسر۔ اوپارے کہ ہراتم ننا الس قومی مشن کن یکجامرے تو نن ہرہدف ءِ دوئی کننگ کینہ۔
