استنبول۔22اکتوبر (اے پی پی) وزیراعظم شاہد خاقان عباسی پارینے کہ ترکی نا دفاعی پیداوار نا صنعت دنیا نا گچین ءُ صنعت اسے، ہرانا ہچ گہس مقابلہ ٹی اف۔ یک شنبے نادے ڈی ایٹ کانفرنس اٹی بشخ ہلنگ آن پد وطن آ پدی بننگ آن مست ترکش جنگی ہیلی کیپٹر ٹی 129 اٹی آزمائشی پرواز کرے و اودے متاثر کن و گچین ءُ مشین اس گوندا۔ آزمائشی پرواز آن پد پاکستانی و ترک میڈیا تون ہیت وگپ کرسا وزیراعظم پارے کہ ترک ہوابازی نا صنعت ستاء کڑزک۔ وخت اس کہ داڑتون اوار اوار ترک رجب طیب اردوان نا دفاعی پیداوار نا بابت سرسہبیک ہم ستاء کننگ نا لائق ءُ۔ ٹی 129 ہیلی کیپٹر نا اَلنگ نا بابت اسہ سوج اسے نا ورندی ٹی اوپارے کہ ننا فوج داہیلی کیپٹر نا جاچ ءِ ہلنگ ءِ و نن دانا معاہدہ و شرط آتیا ہیت وگپ کننگ اُن۔ داکان مست او ہیلی کیپٹر نا معائنہ ءِ کرے ہراڑے اودے ترک ہوابازی نا محکمہ نا بڑزکو کمامدارآک ہیلی کیپٹر نا تکنیکی مہارت آتیان معلومدار کریر ۔ ایروسپیس انڈسٹریز نا صدر و چیف ایگزیکٹو آفیسر تیمل کوتل اے پی پی ءِ پارے کہ ٹی 129 ہیلی کیپٹر اسہ کم وزن و میزائل و گن آن لیز ہیلی کیپٹر اسے، دا چارمیکو و موثر ءِ۔ اوپارے کہ پاکستان و ترکی نا نیام اٹ سوگودفاعی تعلقداریک ءُ و دفاعی پیداوار نا بشخ اٹی ہم کمک کننگ ءِ۔
