اسلام آباد۔ 22اکتوبر (اے پی پی) اقتصادی معاملہ غاتا بارواٹی وزیراعظم نا خصوصی کمکار ڈاکٹر مفتاح اسماعیل پارینے کہ پاکستان مسلم لیگ (ن) نا حکومت نا دانشمندانہ اقتصادی پالیسی تا سوب جم اٹنگا ملکی پیداوار اٹی مستین نا مقابلہ ٹی بھاز گچینی بسنے۔ پی ٹی وی تون ہیت وگپ اٹی اوپارے کہ مسلم لیگ (ن) میثاق جمہوریت آمبار حزب اختلاف نا جماعت آتون میثاق معیشت آ ہم دستخط کننگ کن تیار ءِ۔ اوپارے کہ 2013ء ٹی جم اٹنگا قومی پیداوار اِراٹک ہشت درسد ئس ہرا حکومت نا دانشمندانہ اقتصادی پالیسی تا سوب داسہ پنچ درسد آن زیات ءِ۔ مفتاح اسماعیل پارے کہ حکومت نا کنڈآن اقتصادی اصلاحات آتیٹی جم اٹنگا قومی پیداوار اٹی ودکی مس۔ اوپارے کہ ساڑی آ مالیاتی نسخان ءِ کم کننگ کن گام گیج کننگ انگ ءِ۔ اوپارے کہ ملک اٹی خراج النگ اٹی گچینی بسنے و نوزدہ سد ارب روپئی صوبہ غاتے فراوان کننگانے۔
