پاکستان جان جوڑی، بنداوی ڈھانچہ، تعلیم و انسانی وسیلہ غاتا انتظام و انصرام اٹی نائیجیریا تون کمک کننگ کیک، ہڑتوم آ ملک آتا نیام اٹ واپار نا بے پناہ وارخواہی ارے، واپاری وارخواہی تے ہڑتوم آ ملک آتا الس نا فائدہ کن کاریم اٹ اتنگ مریک
وزیراعظم نا کنڈآن نائیجیریا نا صدر ءِ پاکستان نا دورہ نا سلہ
استنبول۔ 21اکتوبر (اے پی پی) وزیراعظم شاہد خاقان عباسی پارینے کہ پاکستان جان جوڑی ، بنداوی ڈھانچہ، تعلیم و انسانی وسیلہ غاتا انتظام و انصرام اٹی نائیجریا تون کمک کننگ کیک،ہڑتوم آ ملک آتا نیام اٹ واپار نا بے پناہ وارخواہی ارے، و دا وارخواہی تے ہڑتوم آ ملک آتا الس نا فائدہ کن کاریم اٹ اتنگ مریک۔ اوداہیت ءِ ترکی نامیزبانی ٹی شون ہلوک ملک آتا تنظیم ڈی ایٹ نا 9می سروک دیوان نا وخت آ نائیجیریا نا صدر محمد بوہاری تون ہفتہ نادے ترکی نا تاریخی شار استنبول اٹی اوڑدہی ٹی پارے۔ اوڑدہی ٹی ہڑتوم آ راہشونک ہڑتوم آ کنڈآتا تعلقداری ، چندی بشخ آتیٹی ہڑتوم آ ملک آتا نیام اٹ تعلقداری تا مون آ دننگ نا گمان و تین پہ تینی است خواہی نا ایلو معاملہ غاتیا خیال آتا درشانی ءِ کریر۔ وزیراعظم شاہد خاقان عباسی نائیجیریا نا صدر ءِ پارے کہ پاکستان جان جوڑی ، بنداوی ڈھانچہ ، تعلیم و انسانی وسیلہ غاتا انتظام و انصرام اٹی نائیجیریا تون کمک کننگ کیک۔ اوپارے کہ ہڑتوم آ ملک آتا نیام اٹ واپار نا بے پناہ وارخواہی ارے و داوارخواہی تے ہڑتوم آ ملک آتا الس نا فائدہ کن کاریم اٹ اتنگ مریک ، داکان بیدس پاکستان توانائی نا کاختی نا مون ءِ توننگ آ ہم تینا چکار ءِ کریسس ہرانا سوب پاکستان گونڈ ءُ وخت اسے ٹی توانائی نا ڈٹ آتے قائم کننگ کیک۔ اوپارے کہ پاکستان و نائیجیریا ءِ اسہ وڑنا چیلنج آک مون تروک ءُ و ہڑتوم آ ملک آک دارداٹ اسہ ایلو نا آزموندہ غاتیان فائدہ ہرفنگ کیرہ۔ وزیراعظم نائیجیریا نا صدر ءِ دہشت گردی نا برخلاف کارروائی تا رداٹ پاکستان نا سرسہبی تیان معلومدار کرسا پارے کہ دامہم اٹی پاکستان عظیم قربانی تسنے۔ اوہڑتوم آ ملک آتا اسیجائی وزارتی کمیشن نا دیوان نا زوت آن زوت اڈتننگ نا گرج آ زور شاغا۔ وزیراعظم نائیجیریا نا صدر ءِ پاکستان نا دورہ نا سلہ ہم خلک۔ نائیجیریا نا صدر داوخت آ پاکستان نا کنڈآن نائیجیریا نا فوجی افسر آتے بڑزکو معیار نا تربیت نا فراوانی نا ستاءِ کرے و پاکستان تون ہڑتوم آ کنڈآتا کمکاری ءِ پین مون آ دننگ نا خواہش نا درشانی ءِ کرے۔
