اسلام آباد۔ 19اکتوبر (اے پی پی) وزیراعظم شاہد خاقان عباسی شون ہلوک ملک آتا تنظیم ڈی 8 نا 9می سروک دیوان اٹی پاکستان نا نمائندگی کن پنچ شنبے نادے داڑے سرمس۔ استنبول نا ڈپٹی گورنر مہمت علی الوتاس استنبول بالی پٹ آ وزیراعظم ءِ بخیر کرے۔ وزیر خارجہ خواجہ محمد آصف ہم وزیراعظم تون اوار کانفرنس اٹی شرکت کننگ ءُ۔ معاشی کمکاری آ ڈی ایٹ تنظیم نا 9می دیوان ترکی نا شار استنبول اٹی مننگ ءِ۔ دیوان اٹی باسک ملک آتا سروک مملکت و حکومت شرکت کننگ ءُ۔ اسلامی ملک آتا تنظیم ڈی ایٹ اٹی مصر، ایران ، بنگلہ دیش، انڈونیشیا، ملائیشیا ، نائیجیریا ، ترکی و پاکستان اوار ءُ۔ 8ملک آتا جم اٹنگا آبادی اسہ ارب آن زیات ءِ وخت اس کہ ڈی ایٹ ملک آتا اسیجائی منڈی 10 کھرب ڈالر آن زیات ءِ۔ تنظیم نا مسخت آتیٹی باسک ملک آتا نیام اٹ معاشی کمکاری ٹی ودکی و السی زنداٹی گچینی ہم اوار ءِ۔ ڈی ایٹ نا تنظیمی ڈھانچہ سمٹ، کونسل و کمیشن آ مبنی ءِ۔ سمٹ اٹی سروک مملکت، کونسل اٹی وزیر خارجہ غاک وخت اس کہ کمیشن اٹی بڑزکو کمامدارآک تینا تینا ملک آتا نمائندگی ءِ کیرہ۔ تنظیم نا چارٹر نا رداٹ کشت وکشار ، فوڈ سیکورٹی ، توانائی ، معدنیات ، صنعتی کمکاری، جان جوڑی ، سیل و سوات و ایلو بشخ آتیٹی کمکاری ءِ مون آ دننگ اوار ءِ۔ پاکستان ڈی ایٹ تنظیم نا متحرک باسک ءِ۔ تاریخی شار استنبول اٹی مروک آ 9 می ڈی ایٹ دیوان اٹی سروک مملکت و حکومت آخبت نا لائحہ عمل آ ہیت وگپ کیرہ۔
