پاکستان غٹ دہشت گرد رڑتا برخلاف بے پرخ کارروائی کننگ ءِ، دہشت گردآتا رکھوک ہند جاٹ آک اوغانستان اٹی ءُ
اسلام آباد۔ 19اکتوبر (اے پی پی) دفترخارجہ نا ترجمان پارینے کہ پاکستان غٹ دہشت گرد رڑتا برخلاف بے پرخ کارروائی کننگ ءِ، دہشت گرد آتا رکھوک ہند جاٹ آک اوغانستان اٹی ءُ ، پاک امریکہ بڑزکو کہول آ اوڑدہی تیان ہڑتوم آ ملک آتا نیام اٹ تعلقداری تیٹی مثبت پیش رفت مسنے۔ پاکستانی فورس آتا کنڈآن سرسہب آپریشن آن پد بازیاب کینیڈین جوڑی نا بابت امریکی صدر ٹرمپ انا 14اکتوبر نا کلہو نا ستاءِ کینہ، پاکستان اوغان حکومت و الس نا سرکڑدہ ہی ٹی امن نا مخ تفی و داٹی کمکار نا کڑد ءِ برجاتخک۔ پنچ شنبے نادے ہفتہ وار بریفنگ اٹی دفترخارجہ نا ترجمان محمد نفیس ذکریا پارے کہ پاکستان غٹ دہشت گرد رڑ تا برخلاف بے پرخ کارروائی کننگ ءِ۔ سیکورٹی فورس آتا کنڈآن سرسہب آپریشن تیٹی قبائلی علاقہ غاتون اوار ملک آن دہشت گرد آتا صفایا ءِ کننگانے۔ دہشت گرد آتا رکھوک ہند جاٹ آک اوغانستان اٹی ءُ ۔ کینیڈین جوڑی ءِ اوغانستان آن برمتہ کننگاسس۔ ترجمان اسہ سوج اسے نا ورندی ءِ ترساپارے کہ اومان اٹی ششمی چارکڑدہ ہی مذاکرات اٹی سیکرٹری خارجہ تہمینہ جنجوعہ پاکستان نا نمائندگی ءِ کرے۔ پاکستان اوغان حکومت و الس نا سرکڑد ہ ہی ٹی امن اٹی کمکار نا کڑد ءِ برجاتخک۔ کشمیر نا بابت ترجمان پارے کہ بھارتی فوج مقبوضہ کشمیر اٹی پدریسہ انسانی حق انا خلاف ورزی کننگ ءِ ، تدوک آ منہ دے آن کیہی کودک کشمیری تے شہید کننگا و سیاسی راہشون آتے دزگیر و نظر بند کننگ انگ ءِ۔ ترجمان پارے کہ مقبوضہ کشمیر اٹی جعلی مقابلہ، ماورائے عدالت لس خون و اجتماعی قبرخننگانو۔ بھارت نا لین آف کنٹرول آ دراندازی و ولدا پاکستان آ دوبہ خلنگ داغٹ پلو و مقبوضہ کشمیر نا حالیت آتیان نظر ءِ اسہ کنڈ کننگ کن ءُ۔ ترجمان مسہ سال انا مد اکن پاکستان نااقوام متحدہ نا انسانی حق کونسل نا باسک جوڑ مننگ آ غٹ پاکستانی تے مبارکبادی تس و پارے کہ داسرسہبی دفترخارجہ نا اقوام متحدہ ٹی آفیسران، سیکرٹری خارجہ نا حکمت عملی و پیشن نا ملک تعینات پاکستانی سفیر آتا کوشست آتیان ہی ممکن مس۔ سی پیک نا بابت ترجمان پارے کہ دا علاقائی رابطہ غاتا ڈٹ ءِ ہراڑآن پاکستان ڈیہہ نا اہم بنجا جوڑ مریک۔
