
اسلام آباد۔ 19اکتوبر (اے پی پی) وزیراعظم شاہد خاقان عباسی بین المذاہب و بین العقیدہ ہم آہنگی نا مون آ دننگ نا گرج آ زور شاغسا پارے کہ حکومت اقلیت آتا شرحالی و اوفتا بنداوی حق انا رکھ اکن پرعزم ءِ۔ اوداہیت ءِ پنچ شنبے نادے دیوالی نا وخت آ تینا اسہ کلہو اسے ٹی پارے۔ وزیراعظم دیوالی نا تہوار آ ملک و پیشن نا ملک ہندوبرادری تے مبارکبادی ترسا نیک است خواہی ظاہر کرے و رنگ و روشنائی تا داتہوار دادے ءِ اڈتروک آتا زند اٹی امن و خوشی اتے۔ اوپارے کہ پاکستان نا حکومت اقلیت آتا شرحالی و اوفتا بنداوی حق انا رکھ اکن پرعزم ءِ۔ دارداٹ ننا کوشست آک ننا نبی پاک خواجہ ﷺ نا روشناانگا اصول و ننا قائد و ننا آئین نا وژن نا تابع ءِ۔ وزیراعظم داہیت انا اعادہ ءِ کرے کہ بین المذاہب و بین العقیدہ ہم آہنگی نا مون آ دننگ نا گرج اینو مست آن بھاز زیات محسوس کننگک۔ درحقیقت ہر مذہب امن، ہم آہنگی و انسانیت تون مابت نا مون آ دننگ نا حامی ءِ۔ اومذہبی راہشون آتیا زور شاغا کہ او بنداوی مذہبی اقدار ءِ تالان کننگ و دااقدار نا مون آ دننگ اٹی تینا کڑد ءِ ادا کیر ہرا راج ءِ انسانیت نا رشتہ ٹی گنڈک۔ اوداوخت آ ہندوبرادری آہم زور شاغا کہ او پاکستان نا شونہالی کن تینا قابل قدر خذمت آتے انجام ترساکیر۔ نن ذات و نسل آ مبنی ہروڑنا پرخ آن پاک راج اسے نا مون آ دننگ کن پرعزم اُن۔