تہی کارانی وزیر پروفیسر احسن اقبال ئِ چیر دستی ئَ ایف آئی اے ئِ مزن تک ئِ دیوان، ادارگ ئِ کرد ئِ چار ئُُ تپاسی گرگ بوت
کرپشن ئِ ھلاسی ئِ واستہ ایف آئی اے ئَ زیرو ٹالیرنس پالیشیبرجا کنگ بہ بیت، ادارگ ئَ را نوکیں زمانگ ئِ رد ئَ نوک سر جوڑ کنگ ئُُ ایشرا دروری بنائینگ بہ بیت، نوکیں ٹیکنالوجی ئِ وسیلگ ئَ ڈُنگی آنی گر ئُُ دار کنگ بہ بیت ، وزیر ئِ تہی کار پروفیسر احسن اقبال ئِ پنت ئُُ شون
اسلام آباد ۔ 19 اکتوبر (اے پی پی) وزیر ئِ تہی کار پروفیسر احسن اقبال ئَ ایف آئی اے ھیڈ کوارٹر ئِ تر ئُُ تاب کت۔ پنچ شمبے ئِ روچ ئَ ایف آئی اے ھیڈ کوارٹر ئَ مزن تک ئِ دیوان ئِ برجم دارگ بوت ایشی ئِ تہ ئَ ایف آئی اے ئِ کرد آنی سر ئَ چار ئُُ تپاسی گرگ بوت۔ وزیر ئِ تہی کار ئَ پنت ئُُ شون کت کہ کرپشن ئِ ھلاسی ئِ ھاترا ایف آئی اے ئَ زیروٹالیرنس پالیشی برجم دارگ بیت ئُُ سیاھ پوشاکیں ڈنگ آناں ایف آئی اے ئَ چہ در کنگ بیت۔ وزارت ئِ تہی کار ئِ نیمگ ئَ جاڑی بوتگیں بیان ئِ رد ئَ آئی ئَ پنت ئُُ شون کت کہ ایف آئی اے نوکیں رپک آنی ترز ئَ ادارگ ئَ را دروری ادارگ جوڑ کنگ بیت۔ نوکیں ٹیکنالوجی ئِ وسیلگ ئَ ڈنگی ئَ را گر ئُُ دار کنگ بہ بیت۔ آئی ئَ گوشت کہ ایف آئی اے اکیڈمی ئَ را نوک کنگ بہ بیت ئُُ دوستیں ملک آں چہ اپسرگ آناں ھیل کاری پروگرام آنی تہ ئَ ھوار کنگ بہ بیت۔ وزیر ئِ تہی کار ئَ ائیر پورٹ ئَ مساپر آنی گوما گوں پچیں روھ ئَ ملگ ئِ پنت ئُُ شون کت۔ آئی ئَ گوشت کہ بنی آدم آنی شپوکی ئِ گر ئُُ دار ئِ واستہ گامگیج چست کنگ لوٹ ایت، بنی آدم آنی شپوکی کنگ ئَ چہ میاں اوستمانی پڑ ئَ ھرابیں کلوہ سر بیت، کانود ئَ چہ درئیں کارانی چست ئُُ ایر ئَ دست مانجنیں مردم آنی گوما ترندی ئَ گر ئُُ چیل بوھگ لوٹیت، آئی ئَ گوشت کہ سوشل میڈیا ئَ ، جنگ ئُُ چوپ، گر ئُُ چیل، کسد ئُُ کینگی کلوہ آنی گر ئُُ دار ئِ ھاترا جوانیں گامگیج چست کنگ لوٹ ایت۔ آئی ئَ گوشت کہ ملک دژمن طاقت سوشل میڈیا ئَ ازباب جوڑ کنان ئَ ملک ئِ اندر ئَ کشاں چیل ئَ را گیش کنگ لوٹ اَنت۔ آئی ئَ گوشت کہ سائبر کرائم ئِ گر ئُُ دار ئِ ھاترا ایف آئی اے جوانیں کرد پیلو بکنت۔ تہی کارانی وزیر ئَ گوشت کہ در ملک ئَ ھاسیں رنگ ئَ سعودی عرب ئَ پنڈوک ملک ئِ بدنامی ئِ سبب بوھگ ئَ اَنت، ایف آئی اے زوتاں زوت ایشانی ھلاپ ئَ کاروائی بکن اَنت۔ آئی ئَ پنت ئُُ شون دات کہ جوانیں کرد پیش داروکیں اپسرگ آناں شرتریں آسراتی دیگ بہ بیت۔ دیوان ئَ ڈی جی ایف آئی اے بشیر میمن ئَ تہی کارانی وزیر ئَ را ایف آئی ئِ کار آنی ھوالگ ئَ بریفنگ دات۔
