وزیراعلیٰ بلوچستان نا کوئٹہ ٹی ٹارگٹ کلنگ نا واقعہ غاتا توننگ کن ٹھوس گام گیج کننگ نا پارت

کوئٹہ۔ 16اکتوبر (اے پی پی) وزیراعلیٰ بلوچستان نواب ثناء اللہ زہری کوئٹہ ٹی ٹارگٹ کلنگ نا واقعہ غاتا توننگ و عمومی ڈوہ انا چٹفنگ ءِ المی جوڑ کننگ کن ٹھوس گام گیج کننگ نا پارت کرینے وخت اس کہ او شار آن تجاوزات آتا چٹفنگ کن جاری مہم ءِ پین گچین جوڑ کننگ و کوئٹہ کن خصوصی شونداری پیکج خاص کر سریاب روڈ انا ودیکی و جوڑجاڑ نا ڈٹ آتیا زوت عملدرآمد نا پارت کرینے۔ وزیراعلیٰ ڈی آئی جی کوئٹہ عبدالرزاق چیمہ ، پروجیکٹ ڈائریکٹر کوئٹہ پیکج علی احمد مینگل و ڈپٹی کمشنر کوئٹہ کیپٹن (ر) فرخ عتیق ءِ بٹنگا و اوفتے تون خصوصی دیوان اس اڈ ترسا تعلقدار معاملہ غاتیا بریفنگ ہلک۔ ڈی آئی جی کوئٹہ وزیراعلیٰ ءِ کاسی روڈ و فقیر محمد روڈ آ سم کاری نا واقعہ غاتا سرجم و اوفتے ٹی اوار عنصر آتا دزگیری کن داوخت اسکان نا پیش رفت آن معلومدار کرے۔ وزیراعلیٰ پارے کہ سم کاری نا واقعہ غاتیٹی بے گناہ جان تا زیان ناقابل برداشت ءِ و اوفتے ٹی اوار عنصر آتے اوفتا کروک نا سزا تننگ کن غٹ وسیلہ غاتا کاریم اٹ اتنگ المی ءِ، وزیراعلیٰ اومیت ظاہر کرے کہ پولیس و کانود نافذ کروک آ ایلو ادارہ غاک زوت دہشت گرد آتسکان سرمرسا اوفتے کانود نا رداٹ سزا ترفرہ۔ وزیراعلیٰ ڈپٹی کمشنر آن تجاوزات آتا چٹفنگ کن جاری مہم نا سرجم آتے ہلک و پارت کرے کہ شار انا زیب و زینت و شونداری ڈٹ آتا پوروی ٹی بروک آ تجاوزات آتے دمدستی وڑاٹ اسہ کنڈ کننگے و اوفتے اوار عنصرآک اخس کہ بااثر مریر اوفتا برخلاف کانودی کارروائی کننگے۔ کوئٹہ پیکج نا پروجیکٹ ڈائریکٹر وزیراعلیٰ ءِ پیکج اٹی اوار شونداری ڈٹ آتیا عملدرآمد نا بابت بریفنگ تس وزیراعلیٰ پارت کرے کہ کوئٹہ پیکج آ دمدستی عملدرآمد نا بناءِ المی جوڑ کننگے خاص کر سریاب روڈ و سریاب نا چندی علاقہ غاتیٹی روڈ آتا جوڑ جاڑ ، آب اٹنگا دیر و ایلو ڈٹ آتے بروخت پورو کننگے و شونداری ڈٹ آتا معیار ءِ ہردروشم اٹ برقرار تخنگے دابابت ہچ وڑنا ڈیوالائی اسے سگنگ پننگک۔ وزیراعلیٰ پارے کہ سریاب ءِ شونداری عمل اٹ ہمیشہ گوجالنگانے ہرانا سوب سریاب روڈ و اکیب وکیب نا علاقہ غاک ذبوں حالی نا گواچی ءُ و ہموڑے رہینگوک آ ک زند انا بنداوی آسراتی تیان محروم ءُ ، وزیراعلیٰ پارے کہ سریاب روڈ ءِ ہم ایئر پورٹ نا طرز آ زیباجوڑ کننگے تانکہ قومی شاہراہ تا سنگم آ واقعہ دااہم انگا روڈ انا کمک اٹ شاراٹی پترینگوک آتے کوئٹہ نا بابت خوشگوار تاثر اس ملے۔ وزیراعلیٰ پارے کہ او کوئٹہ پیکج آ عملدرآمد نا تینٹ چاروکی ءِ کیک و ہر 15دے پد پیش رفت دیوان اس اڈ ایتک۔