ڈٹ بندی کمیشن نا ڈپٹی چیئرمین سرتاج عزیز تون برطانوی وزیراعظم نا نمائندہ خصوصی پاکستان و اوغانستان اوون جینکن نا اوڑدہی

اسلام آباد۔ 16 اکتوبر (اے پی پی) ڈٹ بندی کمیشن نا ڈپٹی چیئرمین سرتاج عزیز پارینے کہ پاکستان برطانیہ تون متکن آ تعلقداری و تعلیم، جان جوڑی ، معیشت تون اوار ایلو چندی بشخ آتیٹی تعلقداری تے مون آ دننگ خواہک۔ اوداہیت ءِ برطانوی وزیراعظم نا خصوصی نمائندہ پاکستان واوغانستان اوون جینکن تون اوڑدہی ٹی پارے۔ داوخت آپاکستان اٹی برطانیہ نا ہائی کمشنر تھامس ڈریو، ڈیفیڈبر طانیہ ناڈائریکٹر جنرل و ڈیفیڈ پاکستان نا سروک ہم ساڑی ئسر۔ اوڑدہی ٹی پاکستان و برطانیہ نا تین پہ تینی تعلقداری ، ہڑتوم آ کنڈآتا کمکاری و علاقائی حالیت آتیا خیال آتا درشانی ءِ کننگا۔ سرتاج عزیز پارے کہ پاکستان برطانیہ تون متکن آ تعلقداری و تعلیم ، جان جوڑی ، معیشت تون اوار ایلو چندی بشخ آتیٹی تعلقداری تے مون آ دننگ خواہک۔ اوپارے کہ پاکستان غٹ ہمسایہ ملک آتون پرامن بقائے تین پہ تینی و بریبری نا تعلقداری تا خواہش مند ءِ، پاکستان اوغانستان اٹی امن و شونداری کن تینا پبی کڑد ءِ برجاتخک، نن سمجھنہ کہ پاکستان اٹی امن و شونداری نا عمل اوغانستان اٹی امن تون براہ راست گنڈوک ءِ۔ اوپارے کہ ضرب عضب و آپریشن ردالفساد آن پاکستان اٹی امن ناکسر آوار مس، پاکستان ڈیہہ ٹی امن کن بیش بہا قربانی تس۔ دہشت گردی نا برخلاف سرسہب گام گیج آتیان معیشت نا سوگوی و زرکاری نا کسر آوار مس۔ اوپارے کہ پاک چین اقتصادی راہداری نا سوب پاکستان اٹی جہانی زرکاری نا کسرآوار مس۔ سرسہب معاشی حکمت عملی و گچین اقتصادی پالیسی تیان پاکستان دہ سال اٹی بڑزانگا شرح نمو ءِ دوئی کرے۔ اوپارے کہ پاکستان و برطانیہ نا نیام اٹ بزنس ٹوبزنس رابطہ غاتا مون آ دننگ وخت انا اہم ءُ گرج اسے۔ داوخت آ ہیت وگپ کرسا اوون جینکن پارے کہ برطانیہ پاکستان نا غٹ ویل آتیان معلومدار ءِ و دہشت گردی نا برخلاف پاکستان نا گام گیج و قربانیک ستاکڑزرہ۔ اوپارے کہ برطانیہ پاکستان تون غٹ بشخ آتیٹی کمکاری ءِ مون آ دننگ خواہک۔