پاکستان و ترکمانستان نا نیام اٹ گیشتر اقتصادی کمکاری نا بھاز گنجائش ارے، ہڑتوم آ ملک آتے واپار ، زرکاری و ایلو بشخ آتیٹی زیات رابطہ غاتا ہدف اس بایدے مقرر کروئی مرے
وزیراعظم شاہد خاقان عباسی نا ترکمانستان نا سفیر تون ہیت وگپ
اسلام آباد۔ 16 اکتوبر (اے پی پی) وزیراعظم شاہد خاقان عباسی پارینے کہ پاکستان و ترکمانستان نا نیام اٹ گیشتر اقتصادی کمکاری نا بھاز گنجائش ارے، ہڑتوم آ ملک آتے واپار ، زرکاری و ایلو بشخ آتیٹی زیات رابطہ غاتا بایدے ہدف اس مقرر کروئی مرے۔ او داہیت ءِ پاکستان اٹی ترکمانستان نا سفیر عطاء جان نورلوچ مولاموف تون ہیت وگپ کرسا پارے ہرا دوشنبے نادے وزیراعظم آفس اٹی اوڑتون اوڑدہی کرے۔ وزیراعظم پارے کہ پاکستان و ترکمانستان نا نیام اٹ تین پہ تینی پک و افہام و تفہیم آن اعتبار خڑکی و خوشگوار تعلقداریک ءُ ، چندی بشخ آتیٹی ہڑتوم آ کنڈآتا اشتراک کار پدریسہ ودنگ ءِ۔ اوپارے کہ ہڑتوم آ ملک ترکمانستان۔اوغانستان ۔پاکستان۔بھارت (تاپی) گیس پیپ لین ڈٹ اٹی شریک ءُ ہرا پاکستان نا توانائی گرج آتے پورو کننگ کن بھاز لائخی تخک۔ وزیراعظم تاپی گیس پیپ لین ڈٹ انا زوت فعالیت کن پاکستان نا عزم انا اعادہ ءِ کرے۔ داہیت انا ہم ستاءِ کننگا کہ ہڑتوم آ ملک آک واپار، سفری آسودہی ، سیل و سوات و السی کہول آ رابطہ غاتا مون آ دننگ کن فضائی و ڈغاری رابطہ غاتون اوار گیشتر مواصلاتی رابطہ غاتے کن گام گیج آتیا مرکوز ءُ۔
