اسلام آباد۔09ستمبر(اے پی پی) پاکستان ءَ استیں میانمرءِ سفیر یوون منٹءَ را شمبے ءِ روچءَ دری کارانی کارگسءَ لوٹگ بوتگ حکومت ءُ پاکستانی اُلسءِ نیمگءَ چہ روہنگیا مسلمان آنی ھلاپ ءَ جاری لٹءُ کٹ ءُ کُشتءُ ھون ءِ ھلاپ ءَ ترندیں زارشانی کنگ بوتگ۔ دری کارانی کارگس ءِ جارچین ءِ گشگءِ ردءَ دری کارانی سیکرٹری تہمینہ جنجوعہ ءَ میانمر ءِ سفیر یوون منٹ ءَ را لوٹ اِتگ ءُ روہنگیا مسلمان آنی ھلاپءَ لٹءُ کٹءُ کشتءُ ھونءِ ھلاس ءِ ھاترءَ اثر مندیں گامگیج چست کنگ ، سیکیورٹی پھجارینگ ءُ آھاں بے ترس ءُ بیمءَ آجوئیءِ گوما گردگءِ ھک ءِ دیئگءِ سرءَ زور پِرداتگ۔ دری کارانی سیکرٹری ءَ میانمرءِ حکومت ءَ گوں گشتگ کہ آ روہنگیا مسلمان آنی ھلاپءَ لٹءُ کُٹءُ کشتءُ ھونءِ تہا ھواریں مردماں دزگیر بہ کنت۔ جیڑھءِ مھکمیں گیشءُ گیواری ءِ مولءُ مرادءَ چہ کوفی عنان کمیشن ءِ سفارشات ءِ سرءَ عملدرآمد کنگءِ سرءَ زور پِرداتگ۔ اے سفارشاتءِ تہا لٹءُ کُٹءُ کشتءُ ھونءِ زوتاں چہ زوت گرءُ داری، امنءُ ایمنی جوڈ کنگ، انسانی ھمدردی ءِ بنیاتءَ کمکءَ سر بوھگ ءُ شہریت ءِ جیڑھ ءِ گیشءُ گیواری ھوار اَنت۔ میانمر ءِ سفیر یوون منٹ ءَ دری کارانی سیکرٹری ءَ را اوست داتگ کہ آ حکومت ءُ پاکستانی اُلس ءِ تکانسریءَ چہ میانمر ءِ حکومتءَ را سرپد کنت۔
