سی پیک منصوبہ ءَ چہ دوھیں ملک آنی درنیامءَ دو نیمگی سیادی گیش مھکم بوتگ اَنت
ھزانگءِ وزیر اسحاق ڈار ءِ بیجنگ ءِ ھزانگءِ وزیر زیاوجی ءَ گوں گپءُ تران
اسلام آباد۔9ستمبر (اے پی پی) ھزانگءِ بنجاھی وزیر اسحاق ڈار ءَ گشتگ کہ پاک چین سٹرٹیجک سیادی امنءُ ایمنی ءُ مھکمی ءِ ضمانت اَنت۔ سی پیک منصوبہ ءَ چہ دوھیں ملک آنی درنیامءَ دونیمگی سیادی گیش مھکم بوتگ اَنت۔ بیجنگ ءَ چینی ھزانگءِ وزیر زیاوجی ءَ گوں گپ ءُ تران کنانءَ اسحاق ڈارءَ گشتگ کہ پاکستان ءُ چینءِ درنیامءَ سیاسی ، ادارہ جاتی ءُ ھمک تک ءَ وشیں دونیمگی سیادی اَست وھدے کہ سی پیک منصوبہ ءَ چہ اے سیادی گیش مھکم بوتگ اَنت۔ آئیءَ گشتگ کہ اے منصوبہ دوھیں ملک آناں یکے دومی ءِ گیش نزیک ءَ کاریت۔ آئی ءَ چینی ھزانگءِ وزیر کاریک انسٹی ٹیوٹ ءِ بنگیج ءِ سرءَ آئی ءَ را مرا د بات داتگءُ گشتگ کہ پاکستان انسٹی ٹیوٹ ءِ سُرءُ پُر آنی تہا جوانیں شریداری ءَ را جاری داریت۔ گندءُ نندءِ تہا دوھیں وزیر آں ءَ دونیمگی ھدوکی ءِ کاراں ھوار دونیمگی اقتصادی سیادی ءَ را گیش پراھءُ شاھگان کنگءِ بازیں بھرآنی سرءَ ھیال ءُ لیکہ ءِ درشانی کتگ۔ چین ءِ ھزانگءِ وزیر زیاوجی ءَ چینءِ ترءُ تاب ءَ اسحاق ڈارءَ را وش اَتک کتگءُ گشتگ کہ آ ھمساھگ ملک آنی درنیامءَ مزن تک ءِ دونیمگءِ سیادی ءِ مولءُ مرادءَ را گیش دیم ءِ برگءَ کمک دنت۔ آئیءَ سی پیک منصوبہ ءِ سرءَ وھدءِ سرءَ عملدرآمد کنگءِ ھاترءَ حکومت پاکستانءِ کردءَ را ساڑاتگ۔
