اسلام آباد۔08ستمبر(اے پی پی) مزن وزیر شاہد خاقان عباسی ءَ وزارت کانود ءُ انصاف ءَ را ہدایت کتگ کہ بنجاھ ءِ چیردستی ءَ قبائلی علاقہ جات (فاٹا) ءَ را بنجاھی رپک ءِ تہا آرگءِ ھاترءَ کانود سازگ ءُ انتظامی گامگیج گشاد کنگ بہ بنت تنکہ قبائلی دمگانی اُلس ءَ را ملکءِ دگہ دمگانی اُلسءِ ھم کچ بنکی ھک ءَ رسگ بہ بیت۔ آئی ءَ اے گپ جمعہءِ روچءَ فاٹا اصلاحاتءِ سرءَ عملدرآمد ءِ ھوالگءَ راجی کمیٹی ءِ مزن تک ءِ دیوان ءِ سروکی کتگ ءُ گشگ۔ دیوان ءِ تہا ھوار کمیٹی ءِ دگہ باسکانی تہا چیف آف آرمی سٹاف جنرل قمر جاوید باجوہ، گورنر خیر پختونخوا اقبال ظفر جھگڑا ، خیبر پختونخوا ءِ سروزیر پرویز خٹک، وزیر سیفران لیفٹیننٹ جنرل (ر) عبدالقادر بلوچ، کانودءُ انصافءِ وزیر زاہد حامد، ڈپٹی چیئرمین پلاننگ کمیشن سرتاج عزیز ءُ سینئر سولءُ عسکری حکام ھم ھوار بوتگ اَت۔ کمیٹی ءَ فاٹا اصلاحات ءِ سرءَ مزن گس ءُ قبائلی دمگانی جوانیں ردعمل ءِ سرءَ سدّکی ءِ درشانی کتگ کہ ایشیءِ منظوری کابینہءَ 2مارچءَ داتگ بوتگ۔ چیف آف آرمی سٹاف جنرل قمر جاوید باجوہ ءَ کمیٹی ءَ را گوستگیں لھتیں سالانی تہا سرجمیں فاٹا ءَ ریاستی عملداری جوڈ بوھگءِ ھوالگءَ ھاصل بوتگیں سوبمندی ءُ سیکیورٹی ءُ سیمسر انفراسٹرکچر ءَ را گیش کنگءِ ھاترءَ چست کتگیں گامگیجءُ دیمروئی ءِ کوشستانی ھوالگءَ سرپد کتگ۔
