اسلام آباد۔30اگست(اے پی پی) محکمہ موسمیات ئِ گشگئِ ردئَ گوازوکیں ھپتگ ئَ ملکئِ بازیں دمگاں ھور ئِ امکان اِنت۔ آیوکیں 24کلاکانی تہا جہل دیمیں سندھ ئَ میرپورخاص، حیدر آباد ، کراچی ڈویژن ءَ بازیں ھندءُ دمگاں گوات گرندءُ گروک ئِ گوما ھور ءُ لھتیں دگہ جاگہاں ترندیں ھورءُ گواتئِ امکان اِنت۔ ھمے وڑئَ سکھر، لاڑکانہ، شہید بینظیر آباد، قلات، کوئٹہ، سبی ، ژوب ، نصیر آباد، بہاولپور ، ملتان ، ڈی جی خان ، ساہیوال ، لاہور ، گوجرانوالہ ، راولپنڈی، فیصل آباد، سرگودھا، ہزارہ ڈویژن ، اسلام آباد ، گلگت بلتستانءُ کشمیر ئَ جاگہ جاگہ ئَ وھدے کہ مالاکنڈ، پشاور ڈویژن ئَ لھتیں ھندءُ دمگاں تینزیں گواتءُ گرندءُ گروک ءِ گوما ھورئِ امکان اِنت۔ رپورٹ ئِ گشگئِ ردئَ گوستگیں 24کلاکانی تہا ملکئِ بازیں دمگاں موسم گرمءُ ھشک بوتگ بلے راولپنڈی، لاہور ، گوجرانوالہ ، سرگودھا، فیصل آباد، ڈی جی خان ، ساہیوال ، مالاکنڈ، ہزارہ ڈویژن ءُ کشمیر ئَ لھتیں ھندءُ دمگاں تنیزیں گواتءُ گرندءُ گروک ئِ گوما ھور بوتگ، درساں چہ گیش ھور مری ئَ 44ملی میٹر ریکارڈ کنگ بوتگ۔
