اسلام آباد۔ 29 اگست (اے پی پی) چیئرمین سینیٹ میاں رضاربانی ذرائع ابلاغ نا نمائندہ غاتے باوری ترفینے کہ پارلیمانی پریس گیلری آن واک آﺅٹ آ حکومت نا کنڈآن کرفوک آ یخین دہانی نا فالو اپ کننگ کن معاملہ ئِ سینیٹ نا قائمہ کمیٹی حکومتی یخین دہانی تا حوالہ کننگک۔ سے شنبے نادے چیئرمین سینیٹ میاں رضا ربانی و پارلیمانی رپورٹرز ایسوسی ایشن نا نیام اٹ پارلیمنٹ ہاﺅس اٹی ایوان بالا و ذرائع ابلاغ نا نیام اٹ ورکنگ ریلیشن شپ ئِ گچین کننگ نا بابت اسہ مذاکرہ اس مس ہراٹی پی آر اے نا ایگزیکٹو باڈی نا باسک ، سیکرٹری سینیٹ امجد پرویز آن بیدس ایلو کمامدارآک ہم ساڑی ئسر۔ داوخت آ پی آر اے نا باسک آتا کنڈآن چیئرمین سینیٹ نا کنڈآن ذرائع ابلاغ و سینیٹ سیکرٹریٹ نا نیام اٹ اشتراک کار ئِ گچین جوڑ کننگ نا بابت ہیت وگپ آتا ستائِ کننگا و سینئر صحافیک ذرائع ابلاغ ئِ مون تروک چندی ویل آتون اوار پی آر اے ناپارلیمنٹ ہاﺅس اٹی واقع دفتر نا ودیکی و واک آﺅٹ نا بابت فالو اپ ئِ المی جوڑ کننگ آن بیدس ایلو معاملہ غاتیا خیال آتا درشانی ئِ کننگا۔ چیئرمین سینیٹ میاں رضاربانی ذرائع ابلاغ نا نمائندہ غاتون ہیت وگپ کرسا پارے کہ پی آر اے نا دفتر کن پوسکن آ جاگہ نا تعین ئِ کننگ، پارلیمانی رپورٹرز آتیان ہرسال اسٹ اسے پی ایچ ڈی کن اسکالر شپ تننگ ، کانودی وڑاٹ پی آر اے نا وجود ئِ برقرار تخنگ کن گام گیج ، پریس لاﺅنج نا زیب و زینت نا بابت سنجیدگی اٹ جاچ ئِ ہلنگک۔ داوخت آ او سیکرٹری سینیٹ و تعلقدار کمامدارآتے دمدستی وڑاٹ پیش رفت نا بناءکن پارت ہم تس۔ واک آﺅٹ نا معاملہ غاہیت کرسا اوپارے کہ ہراوخت آ کہ ذرائع ابلاغ اہم ئُ معاملہ سے آ پریس گیلری آن واک آﺅٹ کیرہ ، کوشست کننگک کہ ہمووخت آ ایوان نا کارروائی ئِ توننگے و حکومت نا کنڈآن کرفوک آ یخین دہانی تا فالو اپ کننگ کن معاملہ ئِ ایوان نا حکومتی یخین دہانی تا کمیٹی نا حوالہ کننگک۔
